Diabierna 18 di juni a tuma luga un conferencia di prensa caminda Minister President Evelyn Wever Croes conhuntamente cu señor Marlon Croes, director di DOW, señor Gisbert Boekhoudt, director di DNM, Haime Croes, director di DIP y tambe señor Leo de Cuba director di DLV a presenta e desaroyo di Proyecto Oranjestad.

Minister President a nota cu e turismo di Aruba ta na un 55% di recuperacion na e momentonan aki y si e tendencia continua di e mesun manera, Aruba lo cera aña 2021 cu un 68% di recuperacion, premirando cu otro aña Aruba lo tin un recuperacion di 100% di su turismo.

“Nos no por laga e recuperacion bay sin pone extra enfasis riba caya Betico Croes, centro di nos ciudad. Semper esaki tabata e pulso di nos economia, y nos a purba hopi cos”, Minister President a bisa. “Mi ta kere nos tur ta di acuerdo cu nos kier mira desaroyo, nos sa cu e desaroyo mester ta diferente, nos sa cu e mester ta un combinacion di un poco mas F&B, un poco mas vivienda, combina cu nos tiendanan. Nos sa kico e mescla mester ta, pero nos mester haya kico ta bay ta e catalisado, kico ta bay acelera esaki”.

Na december aña pasa, Minister President a pidi departamentonan di infrastructura pa bin cu un plan pa con pa rebiba caya Betico Croes como tambe alrededor di caya Betico Croes. E meta di esaki ta pa tur departamento traha hunto pa haya e ideanan y consehonan di tur departamento mesora.

“A base di esaki y a base di tur e interes cu tabatin entrega caba na DIP pa trece desaroyo den caya Betico Croes nos a bin ta planifica e presentacion aki”, Minister President a bisa. “Kico nos kier logra? Nos kier mustra kico gobierno por haci di su banda cu e medionan limita cu nos tin, conhunto cu interesadonan, conhunto cu inversionistanan interesa, anto nos kier mustra boso kico tur tin den tapara”.

DIP ta trahando ariba un plan di transformacion di centro di ciudad, conhuntamente cu otro inversionista y stakeholders ta presenta por ehempel renobacion di ex edificio Nikky Habibe cu lo bira un espacio di vivienda y F&B. Tambe tin interes pa trece cambio den full e area di lagun y transforma e ex pomp station, den un area di entretenimento y F&B. Gobierno kier promove y incentiva tambe mas pop-up stores pa haci maximo uso di e espacionan pa eventonan.

“Esakinan ta den liñanan grandi, kico ta e ideanan cu gobierno tin. Awe loke nos kier ta presenta algun idea concreto y talbes esey por stimula bo tambe pa pensa kico ta e miho desaroyo cu abo ta mira den centro di ciudad”, Minister President a bisa.

Señor Haime Croes, director di DIP ta enfatisa 3 aspecto cu ta importante cu DIP kier haci pa incentiva e desaroyo di capital Oranjestad. “Prome aspecto ta cu nos tin cu bay hinca mas incentivo pa e comerciante, anto uno cu nos cuminsa cu nos tin den man, ta cu nos ta kere cu diadomingo asina nos lo por duna precario gratis pa e comerciante por pone su paña pafo, cu nan por cuminsa bende, y nos ta sigur uno cu lo sostene un incentivo asina cu nos ta mira cu ta posibel”, señor Croes a bisa. “Un otro aspecto cu tambe ta importante ta e aspecto di fiscal, cu nos ta bezig studiando awor aki cu nos no tine full cla. Y e di tres aspecto ta e parti di erfpacht canon cu tambe nos ta kere cu nos lo por yega na un incentivo basta si cu e comerciante tambe ta inverti y nos ta mira e cambionan cu nos kier mira”.

Director di DOW, señor Marlon Croes a trece pa dilanti e punto importante di contribucion di sinergia y con por complementa otro pa logra proyectonan grandi pa Aruba. “No ta gobierno so por haci tur cos. Sector priva tambe mester haci su parti pa nos por engrandece Oranjestad”, señor Croes a bisa.

Señor Croes ta enfatisa cu e vision di gobierno ta pa keda crea infrastructura, crea espacio den ley, crea e ambiente pa sector priva por inverti.”Durante di e ultimo remodelacion nos a traha hopi riba e circulacion di trafico pa e por cana un tiki mas miho y diferente parti di Oranjestad ta miho accesibel”, meneer Croes a bisa. “Nos a traha pa drecha e infrastructura di utilidad, di rioolsteltser y tambe di e regenwater voeg, vooral e rioolsteltser ta hopi importante”.

Pa locual ta tata e sistema di tram den caya grandi, ta lamenta cu esaki no a duna e resultado desea. Actualmente e sistema ta para, sector priva hunto cu gobierno lo bay evalua kiko lo bay hasi cune. DOW tin riba lista tambe pa drecha e cayanan alrededor di caya Betico Croes, cu lo bay bira un inversion hopi grandi pa yuda e centro di ciudad.

“Manera mi a menciona, e driver e biaha aki pa e remodelacion di caya grandi ta vivienda den caya”, meneer Croes a bisa. “Nos tin poco edificionan cu ta wordo uza como negoshi abou, na halto como warehouse. Si nos bay bek den decada 1950 y 60, e tabata negoshi abou y vivienda na halto. Esey a cambia y mi ta kere nos tin cu cambia e business model awoki pa nos por acomoda negoshi abou y vivienda na halto atrobe”.

Comerciantenan di caya grandi tabata presente na e rueda di prensa y varios di nan a expresa e necesidad urgente cu tin pa traha un edificio di parkeer. Varios comerciante ta sigura cu e decision di un inversionista por inverti den un negoshi den centro di ciudad ta depende di luga di parkeer. E ta esencial pa e mehoracion di caya Betico Croes.

Tambe comerciantenan a pidi pa gobierno apunta un comision di comerciante cu por tin e libertad y autoridad di tuma decisionnan hunto como comision pa locual ta trata decisionnan mehoracion di caya grandi. E problema di adicto ambulante den centro di ciudad tambe a wordo treci pa dilanti y mas cu claro comerciantenan kier un solucion pa e problema aki ya cu pa hopi aña e problema ta keda ey y ta sigui crece.

Pregunta tocante trafico den caya grandi tambe a bin dilanti y na esaki Minister president a contesta cu na e momentonan aki no lo ta posibel, pero e ta riba mesa pa gobierno haci cambio y duna e pueblo di Aruba e posibilidad un biaha mas di pasa cu nan auto den caya grandi.

Por ultimo Minister President a remarca cu tur e preguntanan, preocupacionnan y ideanan treci pa dilanti door di tur e comerciantenan lo tin e atencion di gobierno y lo wordo teni hopi na cuenta como cu e negoshinan, e comerciantenan ta e curason di caya grandi y gradici nan pa nan input y pa kere den Aruba.