Den e documento cu tabata riba mesa pa Conseho di Ministro di Reino tuma decision encuanto e ayudo na e islanan Curaçao, Aruba y Sint Maarten diabierna pasa ta resalta, for di raportahe di CAft na e Conseho, cu gobierno di Aruba a anuncia cu riba nan mes a dicidi di introduci austerisacion den presupuesto 2020, manera el a keda aproba den parlamento recientemente, loke a reduci e suma di deficit financiero. Tambe a instrui Aruba, y e otro islanan, pa adelanta e plannan pa reforma structural, cu mester ta entrega cerca CAft promer cu 15 di juni.

Un total di Afl. 85,9 miyon mester resulta for di austerisacion den gasto di personal (Afl. 35,6 miyon); pago di pensionado (Afl. 6 miyon); un rebaho di Afl. 10 miyon den e Plan di Crisis Social; Afl. 8,7 di Bienes & Servicio, y Afl. 24,6 miyon di Subsidio&Transmision. Di e ultimo aki no ta conoci exactamente den ki post e reduccion ta cay, pero ta di supone cu un parti importante ta den e subsidio na e fundacionnan cu ta haya subsidio entre otro pa salario di banda di gobierno, y cu tambe ta haya e mesun reduccion cu e ambtenaar tambe ta haya. Esaki gobierno a haci a peticion di Conseho di Ministro di Reino cu a pidi gobierno di Aruba via un carta di 16 di april ultimo, pa a corto plazo yega na reduccion di gasto y cambio den presupuesto pa loke ta e postnan menciona.

Tabel 3

Den e carta di gobierno di 30 di april na Conseho di gobierno di Reino a anuncia cu ta e intencion pa baha e salarionan di ambtenaar, politico y ambtenaar pensiona temporalmente. Den su reaccion CAft ta comenta cu ta haya esaki un bon promer paso pa limita e deficit financiero y cu implementacion lo tuma lugar a corto plazo. Tambe a tuma nota di e deseo di gobierno di Aruba pa limita e salarionan di director y otro funcionarionan te na e maximo di 130 porciento di e salario di e promer ministro.

Den e tabel 4 por observa cu e porcentahenan ta diferencia di esunnan di e ley aproba siman pasa, unda e vakantie-uitkering ta igual (81/3%) pero tabatin pensa di corta solamente 11,7% den e salario di mandatario y parlamentario. Finalmente e decision di conseho di Ministro di Reino tabata pa impone un reduccion di 25% pa e categorianan aki y 12,5% pa e demas funcionarionan di gobierno. Cu esaki e otro islanan no a bay di acuerdo ainda pero gobierno di Aruba si.

Tabel 4

CAft ta remarca cu ta pidi atencion tambe pa un implementacion pronto di e medidanan aki y tambe pa duna esaki efecto den direccion di e tarifanan di consultant y ta conseha Conseho di Ministro di Reino pa yega na un acuerdo cu Aruba tocante esaki, loke a ser efectua tambe den e decision di e Conseho.

Reforma

Pa loke ta e reformanan cu mester conduci na austerisacion di caracter mas structural, CAft ta remarca cu Aruba a anuncia di ta di acuerdo cu e necesidad di reformanan structural y cu e obhetivo tabata pa por entrega e plannan aki na mitar di october cerca CAft. Sin embargo, CAft a pidi gobierno di Aruba pa haci esaki mas tempran, y ta propone pa entrega esaki na CAft promer cu 15 di juni proximo, promer cu e tratamento di e di tres parti di e apoyo di liquidez dia 3 di juli den Conseho di Ministro di Reino.

E peticion pa adelanta e reformanan posiblemente tin relacion cu e posibilidad cu ya den e aña aki por introduci e cambionan legal cu ta necesario pa haci pa e reformanan planifica, si ta trata di asunto cu mester bin na vigor entrante 1 di januari 2021. Mitar di october ta laat pa cuminsa trayecto legal ainda pa logra esaki. Tambe lo ta tuma como punto di salida presupuesto 2021 cu mester ta na parlamento dia 1 di september, cu e posible efectonan di e reformanan structural ya aden.