Den un disposicion duna y publica ayera Corte Comun di Aruba, Curaçao, Sint Maarten y di Bonaire, Sint Eustatius y Saba a husga di similar manera cu e veredicto di Hues di Prome Instancia na Aruba siman pasa, den e caso di Pais Aruba contra Fundacion Lotto pa Deporte (FLPD), den e caso di apelacion cu Pais Aruba a entama despues di a perde e caso sumario (kortgeding) aña pasa na februari.
Den e caso sumario ey, Hues di Prome Instancia a anula e retiro di e miembronan di e directiva di FLPD y a anula tambe e nombramento di e directiva nobo cu e ministro encarga cu deporte a nombra na inicio di 2018.
Den su disposicion Corte Comun ta señala cu e Hues cu den un caso sumario mester duna un decision riba un demanda pa duna un ‘voorlopige voorziening’ (medida provisional) despues cu e Hues den e ‘bodemprocedure’ a duna veredicto caba (loke den e caso aki a sucede siman pasa, dia 24 di juli), mester duna sentencia di acuerdo cu e veredicto di e Hues den e bodemprocedure.
Bao di cierto circunstancia por ta aceptabel pa desvia di e punto di salida aki. Esey por ta e caso si e sentencia di e Hues den e bodemprocedure ta basa riba un eror, tambe si tin tal cambio den e circunstancianan cu e Hues den e bodemprocedure, of si e tabata na altura di tal circunstancia cambia, lo a yega na un otro decision.
Corte no ta mira den e caso aki ningun base cu por conduci na e conclusion cu algun di e circunstancianan describi lo ta aplicabel. Por lo tanto Corte Comun ta yega na e decision di confirma e sentencia di e Hues den e bodemprocedure. Esaki ta implica confirmacion di anulacion di e retironan di e directiva, y anulacion di e nombramento di e directiva nobo di banda di e ministro concerni.
Mientras tanto, ministro encarga cu deporte a anuncia caba cu lo apela e decision di Hues di Prome Instancia den e bodemprocedure na Corte Comun. E disposicion duna ayera pa Corte Comun riba e caso sumario si no tin mas posibilidad di apelacion.
