Sindicato SEPPA ta haya contradictorio cu no a involucra Centro Multidisciplinario (MdC) for di principio den e desaroyo di Plan Enseñansa Nacional (PEN) y Sociaal Crisis Plan.
E trahadonan di e centro aki ta haya di suma importancia pa tin dialogo, informacion, participacion y pa asina por carga e cambionan. Esaki pa evita cu ta bin cu decision of cambio sin tene cuenta cu tur factor y actor involucra.
Nan ta boga pa inclui e profesionalnan di e centro den e procesonan aki, mirando Centro Multidisciplinario su rol importante y crucial den nos enseñansa y tambe den e problematica social di nos pais. Asina ta evita cu decisionnan por ta den desbentaha di e ayudo na nos muchanan y calidad di cuido den enseñansa.
Procedura profesional, integro y transparente ta pa analisa kico ta punto pa traha riba dje, involucra e profesionalnan concerni. Nan ta haya cu e maneho unilateral aki di Minister Rudy Lampe encarga cu enseñansa a trece hopi incertidumbre te dia di awe dor di no trece claridad pa e mayornan, maestronan y e trahadonan di e centro aki.
SEPPA ta conclui cu ta cuestionabel cu ta laga personal bay ‘ter beschikking’ for di Centro Multidisciplinario pa otro caminda, cu no por reemplasa nan, no ta yena vacatura, cu kier cera e Observatiecentrum y Teacher Care, kier kita e tarea di indicacion y ta exclui e centro aki di tur desaroyo ariba nivel di enseñansa y kier haci esakinan sin argumentonan bon funda y no carga.
Mientras cu na comienso a kere cu kisas ta e Ministro di Enseñansa so ta pensa di e forma aki, aworaki nan tin e duda, ya cu di parti di esunnan na cabes di e gobernacion mes, no tin ningun solucion di nan banda cu a bin riba mesa. Nan ta spera cu den e reunion di mañan cu Minister Presidente, finalmente nan por mira cu un solucion fiho por yega pa atende cu nan demanda expresa den e manifiesto cu nan a yega di entrega na gobierno y Parlamento.
