Gobierno a manda Parlamento proposicion di cambio ley pa paga overbrugginstoelage mas trempan 

Un total di 13 ex Parlamentario y 3 ex Minister lo ricibi nan compensacion di transicion for di dia cu nan a baha. Parlamentarionan cu na Juli 2021 a bandona e funccion ta bay ricibi un suma mas halto cu inicialmente calcula pa e aña cu a transcuri. Motibo ta cu aunke cu e pago di overbruggingstoelage ta keda mara na un aña despues di retiro, nan por cobra entrante e momento cu nan a baha y no warda pa haya e suma e siguiente luna.

Parlamento a haya e proposicion di ley di cambio di overbruggingtoelage pa trata, a discuti e proposicion den Comision Central despues cu e proyecto a drenta Parlamento dia 23 di December 2021.

E proposicion di ley tabata entrega pa Prome Minister Evelyn Wever Croes, den su calidad di e titular encarga cu Asunto General, Integridad, Administracion Publico, Innovacion y Energia,  Minister Xiomara Maduro  encarga cu Finanzas, Economia y Cultura y Minister Rocco Tjon, encarga cu Husticia, Siguridad y Integracion.

Segun e proposicion di ley, pa motibo, y cu na momento cu un Parlamentario y Minister bandona su funcion e por core risico pa un caida abrupto den entrada, e tin derecho pa e asina yama overbruggingtoelage, manera e ta pon’i den e ‘Landsverordening gewezen politieke ambtsdragers en hun nabestaanden.’ E ley aki ta conta pa Minister, Parlamentario y Ministernan Plenipotenciario cu ta retira.

E cambio ta cu por cuminsa cobra e overbruggingstoelage for di momento cu tuma baha for di e funcion, enbes di warda pa e prome dia di e siguiente luna cu a baha como Parlamentario of Minister, manera cu e ley tabata dicta.

E cambio ta di forsa retroactivo te cu Juli 1, 2021. Ta trata di un adelanto pues di e pago di e overbruggingstoelage. Articulo 4 di e ley ta bisa cu na momento cu baha di e funcion (como Parlamentario of Minister), pa evita un caida drastico y abrupto den entrada, por apela pa un overbruggingstoelage (un pago di transicion), basta cu cumpli cu condicionnan (red. entre otro, si e entrada cu ta ricibi despues ta menos cu locual tabata cana como Minister of Parlamentario.

Si e entrada ta mas halto, no ta ricibi e overbruggingstoelage. Ademas, e ta pro rata, den sentido cu e salario cu un ex Parlamentario of ex Minister tin despues di baha for di e funcion, mester keda desconta di e overbruggingstoelage).

E obhetivo di e overbruggingstoelage como tal ta pa evita cu e ex mandatario y ex Parlamentario ta perde gran parti di su entrada. P’esey ta mas logico cu e areglo ta drenta na vigor riba e dia cu ta baha y no conforme articulo 4, inciso uno, cu ta papia di e prome dia di e prome luna despues di a baha di e funcion.

E cambio aki ta nifica cu ta evita cu e ex Parlamentario of ex Minister ta keda sin entrada e prome simannan, cu segun e ley, ta un situacion drastico y abrupto.

Segun Gobierno, e risico a bira mas grandi ainda, pa motibo di e introduccion di recortenan di salario y otro compensacion na tanto Parlamentario y Minister. Ta cambionan cu a bin na Mei 2020 y e ‘Landsverordening tijdelijke versobering bezoldiging en voorziening overheid.’ Ambos ta trata un desviacion temporal cu ta nifica cu a corta 16 2/3 porciento di nan entrada a base mensual y tambe a para e pago special di 8 1/3 porciento cu por ta comparabel cu e asina yama vakantie uitkering.

Pues, si un Minister of Parlamentario baha na comienso di luna, por papia di un caida abrupto di entrada ya cu no a traha suficiente pa haya salario completo. Cu e cobranza adelanta di e overbruggingstoelage lo no mester warda un luna, sino por cuminsa cobra mesora. E periodo total di e overbrugging sinembargo ta keda igual esta cu e pago ta conta pa un aña desde cu e Parlamentario y Minister a baha.

E cambio tin un consecuencia financiero pa 2021, den sentido cu e costo nan lo subi cu locual inicialmente tabata presupuesta. E motibo ta cu 13 Parlamentario a baha dia 8 di Juli y na September, tres Minister a retira. E costo di overbrugging pa Parlamentarionan ta core pa presupuesto di Parlamento, mientras cu e overbrugging di Ministernan ta core pa presupuesto di Pais Aruba.

Raad van Advies tabata de acuerdo cu e proposicion di Gobierno y unicamente  a pidi un splicacion mas cla, unda ta ilustra e papel di e crisis di COVID-19 pa e cambio di ley aki.

Bon Dia Aruba a compronde cu Parlamento a trata e ley den Comision Central, hunto cu e proposicion pa e LIM nobo, esta e Landsverordening Instelling Ministers, unda ta regla formalmente e Ministerionan di Gabinete Evelyn Wever Croes II.