Ayera tardi mediante un comunicado di prensa minister di Transport, Integridad, Naturalesa y Asuntonan di Adulto Mayor, Ursell Arends, a anuncia cu director di Arubus, Edwin Mohamed, ta retira for di su posicion inmediatamente.
Despues di e anuncio aki tabatin algun rumor caba tocante un posibel director nobo. Reportera di Bon Dia Aruba a tuma contacto cu minister Arends pa puntra si berdad tin otro persona caba cu lo asumi e cargo aki of si tin un candidato, kico ta e proceso pa apunta un director nobo y kico ta e motibo cu a dicidi pa libera sr. Mohamed di su cargo.
Minister Arends a splica den su contesta cu e situacion financiero di Arubus ta critico cual a ser confirma pa varios instancia profesional y imparcial. Instancianan aki ta Algemene Rekenkamer, CAft y Price Waterhouse Cooper.
“Asina mes mi ta carga speransa cu e compania lo por sobrevivi. Pero pa logra esey Arubus no por sigui enfoca solamente riba nan tarea social. Mester expande y reforsa su tarea comercial,” el a remarca.
El a indica cu tin un diferencia di opinion y un diferencia fundamental di vision entre e accionista y hunta di directiva, compara cu e director saliente. El a señala cu e punto di salida di Gobierno ta cu Arubus no por sigui depende solamente riba fondonan publico y cu e instancia mester expande su servicionan comercial tambe, na mes manera cu tur otro NV.
“No por hustifica tanto beneficio cu a ser otorga na trahadornan, sin cu e parti comercial ta produci minimo un resultado aceptabel. Pa un motibo Gobierno a haci e empresa un NV. Na prome instante lo apunta un gerente temporario, mientras cu e hunta di comisario independiente di gobierno ta traha riba seleccion di un gerente nobo na un forma transparente y conforme e reglanan di ‘Good Governance’,” el a remarca.
El a subraya pues cu no tin director nobo y actualmente ta den proceso pa nombra un director interino – temporario – pa asina tin un persona na cabes mientras cu ta cuminsa e trayecto di busca un director nobo. “Tin un proceso cu mester observa na momento di nombra director y durante e proceso ey e compania no por keda sin un gerente na cabes,” el a resalta.
