Ayera tardi durante conferencia di prensa di gobierno Prome Minister, Evelyn Wever-Croes a anuncia cu gobierno a institui un comision nacional dedica na e lucha pa stop violencia y maltrato contra hende muhe. E comision “Stop Violencia Contra Hende Muhe” ta lidera pa directora di Centro di Desaroyo di Hende Muhe (CEDEHM), Miangela Ras.
Manera ta conoci caba, desde 25 di November te cu 10 di December, Aruba ta entre e paisnan cu ta participando na e 16 dianan di activismo contra abuso y maltrato di hende muhe y mucha muhenan.
E mandatario a remarca cu lamentablemente na Aruba tambe e tipo di abusonan aki ta tuma luga. Esaki a resalta den un estudio conduci pa Sra. Mr. Alida (Lili) J. Rasmijn-Marval, yama “Women’s experiences of intimate partner violence in heterosexual relationships in Aruba and the negative health consequences”.
El a enfatisa cu a pesar cu na Aruba hopi hende ta purba na tene esaki scondi, tin indicacion cu aki na Aruba tambe 1 den cada 3 mucha muhe hoben, of hende muhe, den algun momento di nan bida ta bira victima di abuso na man di su pareha.
Memey di e 16 dianan di activismo aki, Prome Minister a institui e comision nacional bao liderazgo di e directora di CEDEHM) Sra. Miangela Ras, pa yuda gobierno den e lucha pa stop abuso y maltrato contra hende muhe.
El a señala cu un di e metanan di Desaroyo Sostenibel cu Nacionnan Uni a stipula pa un miho mundo, SDG5, ta indica cu mester purba logra igualdad, y empodera tur hende muhe. E comision cu a wordo institui, tin como encargo pa bin cu propuestanan concreto, con pa bringa e tipo di abuso aki eficazmente.
Mirando cu e comision lo toca diferente ministerio, Prome Minister a pon’e resorta bao di e Ministerio di Asuntonan General y lo bay consisti di cinco miembro di diferente area publico, y semi-publico y e comision nacional lo realisa accionnan coordina pa elimina tur desigualdad cu por existi den posicion di hende muhe y hende homber na Aruba.
