Awe tardi, durante un conferencia di prensa di Gobierno di Aruba, minister di Comunicacion, Sector Primario y Transporte, Chris Romero a duna di conoce cu lo trece dilanti un permiso temporal pa loke ta trata tiramento di pisca mientras cu e ley lo keda cla na final di aña.
Romero a informa cu den ultimo dianan aki por wordo mira diferente noticia cu tin caminda cu diferente persona ta busca y ta usa diferente metodo pa asina haya cuminda den tempo di crisis aki di COVID-19, specificamente tiramento di pisca.
Romero a expresa cu hunto cu minister Bikker, Directie Natuur en Milieu (DNM) y Santa Rosa desde aña 2018 a forma un comision pa bin cu diferente sugerencia, pero e como minister a afirma cu e ta apoya loke ta e tiramento di pisca.
Desde basta tempo nan ta haci impulso pa diferente cambionan pa trece dilanti e concepto di ley pa cu esaki. Romero a menciona cu tiramento di pisca tin reglanan cu ta tumando luga di loke ta trata alimentacion y cu den necesidad di e crisis aki, esey no ta nifica un alimentacion pa un famia so sino pa varios, asina tambe ta un sosten economico.
Mirando e emergencia cu e pais ta aden y falta di ingreso pa cu turismo, Romero a declara cu hopi piscado a dicidi di realisa e practica aki mas frecuente haciendo uso di diferente metodo, pero tambe mester recorda riba medio ambiente.
Asina mes, el a declara cu lo duna un permiso, pero esey ta regarda reglanan cu tur hende mester respeta. Un di e categorianan cu a wordo poni den e ley, Romero a bisa cu ta e piscamento di diferente especie cu a trece confusion entre piscadonan y nan a wordo perhudica un tempo pasa y algun fout a wordo cometi pa e ley aki.
Den e concepto nobo cu a wordo traha, minister Romero a señala cu nan ta bay realisa tur diligencia necesario pa asina bin cu un permiso temporal pa te ora e ley mes por keda completo prome cu fin di aña.
Ademas, el a manifesta cu den dianan aki hunto cu Santa Rosa lo anuncia e maneho necesario pa cu e permiso aki, pa asina por tira den awanan, pero cu e rekisitonan nobo. Di esaki el a enfatisa cu lo wordo otorga door di minister di Sector Primario.
Den dianan aki, tin hopi pregunta cu hendenan a haci tocante ken mag of no di bay pisca, pa loke el a menciona cu algun siman atras Santa Rosa a habri un par di dia pa e hendenan por registra y haya un comprobante cu ta bisa cu ta un persona cu ta pisca of riba lama, baranca y tambe otro cu por bisa cu ta haci esey como parti di su alimentacion no di recreacion. Un parti cu ta pa brinda un posibilidad pa e persona por tin cuminda riba su mesa. Di esaki el a comenta cu el a duna e permiso otro biaha mas pa esunnan cu tin interes di haya e comprobante aki bay registra riba e website of pagina di Facebook di Santa Rosa y Ministerio di Sector Primario.
Pa finalisa, Romero a relata cu Gobierno di Aruba ta purba pa yuda tur hende, pero e comunidad tambe mester duna algo riba nan banda y mantene den e reglanan stipula.
