Despues di 4 luna cu a entrega e cambio den ley na Parlamento diabierna awo ta trata e ley di All-inclusive. Den cuadro di esaki Banco Central a duna un presentacion na Minister Otmar Oduber.
Ta asina cu tanto fraccion di MEP como esun di AVP a haci un peticion na Banco Central pa traha un rapport riba e ley proponi di All-inclusive y tambe riba e impacto cu esaki lo por tin riba economia. Bon Dia a logra di obtene e rapport. Sinembargo for di departamento di turismo a sali un relato unda e minister ta declara cu e rapport di Banco Central ta cuadra cu esun di PWC. E ultimo a traha un rapport riba peticion di e gobierno, specificamente e minister encarga cu Turismo , esta Otmar Oduber.
Awe ta sali un aviso nobo den tur medio di comunicacion di parti di e organisacion Ahata cu ta representa e sector di hotel y otro negoshi den turismo. Diabierna awor parlamento lo trata e cambio cu gobierno a propone y e aviso ta indica cu e sector di turismo awor ta den man di parlamento. Como cu Ahata ta contra e proposicion y asina kier mustra parlamento pa no vota pa un ley cu ‘ta stroba crecemento di turismo y desaroyo economico’ segun nan.
Sinembargo Minister Oduber ta indica cu e rapport di Banco Central ta den liña cu locual e rapport di PWC y e otro rapportnan ta trece dilanti. “No por tin discusion riba e impacto financiero di un bishitante cu ta keda den un camber All-inclusive cu ta substancialmente menos cu esun di un bishitante cu ta keda den un camber tipo EP, esaki a keda demostra cu cifra y actualisa pa cu e situacion na Aruba.”
