Gobierno a gana caso contra Amsterdam Manor y AWSS, e compania nobo encarga cu RWZI na Bubali, loke ta nifica cu gobierno no mester paga boet pa no haci e trabaonan necesario pa limita e molester di awa sushi na e hotel y den e area.

Segun portal noticiero NoticiaCla a reporta, durante e caso a conclui cu no por tene gobierno responsable pa tur e acusacionnan di e hotel. Asina a conclui cu ya a cumpli of ta cumpliendo cu e sentencia di dia 8 di mei 2024, den cual a impone riba gobierno un set di medida pa implementa pa remedia e situacion di mal holor, cu ta consecuencia di un fayo na e planta di tratamento di awa di riool, RWZI.

Den e caso aki, hues tabata di acuerdo cu e posicion di gobierno, y a dicta cu no por cobra e multa cu e hotel tabata alega den e caso, cu tabata mas cu 1.5 miyon florin. Hues a bisa cu den caso cu gobierno viola e acuerdo nobo, e hotel eventualmente por cobra un multa di maximo 330mil florin en bes di 5 miyon, y ta un multa cu por cobra solamente un biaha.

Caso
 Dia 8 di mei 2024, Corte den Prome Instancia a dicta su veredicto den e caso cu Amsterdam Manor Beach Resort a entama contra Gobierno di Aruba relaciona cu e planta RWZI Bubali Plas, na unda corte a dicta sentencia na fabor di Amsterdam Manor.

RWZI ta trata e awa sushi di un parti grandi di e area di hotel na Aruba. E capacidad di RWZI ta mas o menos 4.500 m3 di awa sushi pa dia. Actualmente, e capacidad ta wordo supera grandemente. E cantidad di awa sushi cu ta drenta ta mas o menos 8.000 te 9.000 m3 pa dia y por aumenta te na 12.000 m3 pa dia durante dianan di yobida. Amsterdam Manor a wordo construi den e decada di 80 na Eagle Beach y ta situa bao di biento di e RWZI. For di e decada di 90, e hotel ta sinti molester di RWZI den forma di mal holor y musca.

Pa varios aña e partnernan ta den combersacion tocante e molester di holor cu Amsterdam Manor ta sufri.

Na 2002, pais Aruba a compromete su mes pa tuma medidanan pa limita e molestia. Den diferente caso legal entre Amsterdam Manor y pais Aruba, corte a dicta diferente sentencia.

Pais Aruba tin plan pa privatisa e plantanan di RWZI y transferi nan pa AWSS, un compania di Utilities Aruba NV y accionista di Utilities Aruba ta pais Aruba. E proyecto di Ley pa privatisa RWZI a wordo presenta na Parlamento dia 16 di april 2024. E siman aki gobierno a ricibi e preguntanan for di parlamento y aworaki ta en espera pa trata e ley den sala di Parlamento.

Pa loke ta e veredicto di dia 8 di mei, corte a dicta su sentencia den cual a detaya un cantidad di boet si Gobierno no cumpli cu medidanan stipula, manera instalacion di aerator, borstelbeluchters, y tanki di sedimentacion na RWZI.