ORANJESTAD – Ayera a keda firma un acuerdo entre gobierno y e companianan aereo cu ta opera entre Aruba y Venezuela, pa introduci formalmente un pre-screening pa e bishitantenan di e pais bisiña.
Te ainda no a wordo informa e fecha cu lo drenta na vigor oficialmente. Pero si e proceso di negociacion, cu tabata tumando luga entre gobierno y e companianan aereo, a culmina cu e firma di e acuerdo aki.
Acuerdo y control
E acuerdo aki ta subraya e responsabilidad mutuo cu gobierno ta comparti cu e aerolineanan pa cu e situacion cu nos pais y nos region ta pasando debi na e situacion interno na Venezuela.
E acto di firma di e acuerdo di intercambio y procesamento di data a tuma luga cu presencia di minister di husticia, Andin Bikker y minister di transporte, Chris Romero y representantenan di e aerolineanan, na departamento di aeronautica civil. Bikker a laga sa cu loke gobierno y e companianan aereo kier ta pa esunnan cu ta bishita nos isla ta ‘turistanan genuino’, esta turista cu ta bishita Aruba pa contribui cu nos economia y pasa un vakantie riba nos isla.
Basicamente, e acuerdo aki ta un instrumento pa persona cu record criminal, of persona cu den pasado a wordo deporta, ta wordo prohibi pa bin Aruba prome cu e ta aborda e vuelo. Pa medio di informacion facilita digitalmente pa e compania aereo, autoridad local por sa cu anticipacion ken ta e pasahero cu tin intencion di bin Aruba.
E proceso aki ta wordo diligencia den e laso di 72 ora maximo –unabes cu nan ta ricibi den e plaso aki tur informacion di antemano– pero nan lo ta mas diligente posibel. Actualmente no tin cu paga pa e proceso aki. Pero e no ta descarta cu den futuro, ora cu nan introduci e sistema electronico di ESTA, gobierno lo tin e discrecion pa cobra p’e.
E mandatario di husticia a laga sa cu e cuadro legal di e acuerdo aki ta hinca den e decreto gubernamental cu ta regarda e admision di turistanan. E ta para den articulo 3, entre otro, cu e aerolineanan mester duna di conoce ken ta e pasaheronan cu ta bishita nos isla. Tambe for di 2012 tin un ordenansa cu ta reglamenta a base di kico data personal por wordo warda, y con esaki por wordo comparti.
Haciendo uzo di e facilidad tecnologico y di sistema di intercambio di data digital cu ta wordo implementa internacionalmente, manera ‘advance passenger information system’ y/of p’assenger name registration system’ (PNR) cu ta core paralelo cu e sistema di ESTA –cu ta un pre registracion pa bay Merca– nan a dicidi di anticipa na esakinan.
Romero a bisa cu departamento di aereonautica civil tin e facultad y obligacion legal di por guia un proceso asina. Pero tambe vigila y implementa diferente proceso cu tin di haber cu aeropuerto. A pesar cu e operacion aereo entre Aruba y e bisiña pais a cay hopi, ainda e ta basta activo.
