Gobierno a elimina compra y benta di permiso di taxi, pero rumornan ta indica cu esaki toch ta tuma lugar

Ayera ariba un pagina popular unda hende ta bende y cumpra articulo- y/of servicio ariba rednan social, un persona a indica cu e tin interes pa cumpra un permiso di taxi. E publicacion a ricibi algun reaccion, pero loke tabata notable ta cu a pesar cu segun ley ya no mag bende permiso di taxi, tin hende ta indica cu esaki toch ainda ta tuma lugar.

E usuario di Facebook aki a acudi na e pagina popular pa puntra si tin algun persona cu tin informacion tocante compra di permiso di taxi, pasobra e ta buscando un. Algun otro usuario a reacciona indicando cu esaki ta algo cu ya no ta sucede.

“No ta permiti bende vergunning mas. Gobierno a stop e cos ey hopi aña atras. Ni por pas’e pa famia mas tampoco segun mi. Ora e persona no ta/por core taxi mas, gobierno ta trek in e vergunning y duna otro hende cu a aplica y ta riba wachtlijst pa haya,” un usuario a splica.

Otro usuario a reacciona ariba e comentario aki indicando cu e practica di pasa un permiso di taxi pa otro famia si ta tuma luga ainda. “Por pas’e pa famia ainda, bende si no mag bende mas, unless bo ta friends and family ooepsss,” el a remarca.

Un usuario a cuestiona kico ta e contesta corecto pasobra “caya ta papia” cu ainda tin hende ta bende permiso y te hasta tin areglonan di “huurkoop” ta tuma luga cu e permisonan di taxi.

E ocupacion di taxista na Aruba ta uno hopi yamativo mirando e cantidad di bishitante cu Aruba ta ricibi, e cantidad placa cu nan ta gana y “flexibilidad di e trabao” ya cu e taxista mes ta dicidi e orario cu nan ta traha.

Na mas di un ocasion personanan interesa den cumpra permiso di taxi sa bin pa dilanti puntrando tocante esaki y aunke legalmente esaki no ta permiti mas, tin indicacionnan cu tin hende ta haci e tipo di negoshinan aki ainda “bao mesa”.

Algo cu ta hiba na un otro problema, taxinan pirata. Un fenomeno cu segun minister di Transport a indica den pasado, nan ta atende cune, pero cu ainda tambe ta sucede.

Te cu november aña pasa, segun minister di Transport a indica, tabatin un total di 465 permiso di taxi, y segun el a indica e intencion ta pa aumenta e cantidad di permiso cu ta ser entrega, mirando e cantidad di hotelnan nobo cu lo habri na e isla.