E aumento den casonan di Covid-19 dia pa dia ta birando mas alarmante. Ayera a registra 123 caso nobo di e malesa causa pa e virus SARS-CoV-2, mientras cu DVG a indica cu 34% di e residentenan cu a test positivo tabatin tur dos dosis di vacuna.

DVG a informa den su resumen diario riba desaroyonan di e pandemia, cu ayera 39 persona a recupera. Di e 123 caso nobo di Covid-19 cu a keda registra, 7 ta turista y 116 ta residente di Aruba. Cu esaki, e tasa di positividad entre nos residentenan ta 33 porciento. Esaki caba ta duna un indicacion cu mester amplia e criteria pa haci test. Organisacion Mundial di Salud ta recomenda pa mantene un tasa di positividad di 5% of menos, y na momento cu esaki subi, mester haci mas test pa detecta casonan asintomatico.

Sinembargo, ciudadanonan cu a papia cu Bon Dia Aruba a indica cu no ta logra haya un cita pa haci test cu DVG si no tin suficiente sintoma. Un ciudadano a conta cu e tabatin tosamento y dolor di garganta, y a yama pa haci test; pero DVG a considera e sintomanan aki como no suficiente pa mand’e test. Esaki mientras DVG mes ta indica cu e datonan ta mustra un aumento alarmante den casonan di Covid-19. Un averahe semanal di 68 caso pa dia y un averahe semanal di tasa di positividad di 28% pa dia, cu segun DVG mes, ‘ta sigui subi’.

Igualmente, DVG a informa cu tin 19 persona hospitalisa di cual 5 ta den ICU y 14 riba piso general. E datonan ta ilustra cu 17 di esnan ingresa den hospital pa Covid no tin ningun vacuna, y solamente 2 persona tin vacuna. Tur esnan den ICU ta sin vacuna. Sinembargo, di e 116 caso di residentenan cu a keda registra, DVG ta señala cu 73 persona (63%) no tin ningun vacuna, 3 persona (3%) tin un vacuna, y 39 persona (34%) tin tur dos vacuna. Maske dos tercera parti di e casonan positivo no tin vacuna, toch un tercer parti tin ambos vacuna y a presenta suficiente sintoma cu a rekeri pa nan haci test.

Y mientras cu e siguiente ‘ola’ di infeccion di Covid-19 ta cubriendo nos isla, e ultimo decision di gobierno pa cu e pandemia tabata dia 9 di juni, y desde esaki no a haci ningun cambio na e maneho. Dia 9 di juni, segun datonan oficial, tabatin apenas 4 caso nobo registra y 35 caso activo. E dia ey, gobierno a dicidi cu persona vacuna no mester bay den cuarentena, uso di tapaboca no ta obligatorio, ta permiti organisa deporte y contact sport, a elimina gebiedsverbod, permiti pa 10 persona sinta na un mesa, y a elimina tur limite riba entretenimento pa musiconan. Awo dia 4 di augustus, casi dos luna despues, e cantidad di caso pa dia ta mas cu 50 y tin 600 caso activo na luga di 35, pero toch gobierno no a bin cu ningun actualisacion riba website oficial di pandemia, arubacovid19.org, cu ta refleha e situacion actual di e pandemia.

Mientras gobierno demisionario ta cu vakantie, e virus ta sigui traha como si nada.

​