Diahuebs 11 di januari Minister di Enseñansa y Deporte, Endy Croes, a tene un conferencia na unda el a elabora ariba diferente punto relacion cu enseñansa. El a toca e tema di Formatie Rapport y Instellingsbesluit pa Directie Onderwijs, su reunion cu e cabesantenan di scolnan di DPS, construccion di Juliana School y normbedrag.

Minister Croes a informa cu durante un bishita na Departamento di Enseñansa el informa na e empleadonan di e departamento cu tanto e Formatie Rapport como e Instellingsbesluit nobo pa Directie Onderwijs a keda aproba y ta valido desde 1 di januari 2024.

El a splica cu desde 2010 CAD a skirbi un rapport na unda a duna un opinion y evaluacion di efectividad di e Interne Beheersing Systeem di henter e departamento. E rapport di CAD aki a wordo usa e tempo ey como nulmeting y hunto cu conseho di DPO, despues a bira DRH, a bira e motibo pa inicia un trayecto di restructuracion den su totalidad.

E meta primordial pa esaki, el a remarca, tabata pa eleva e efectividad y eficiencia di e Departamento di Enseñansa. Na januari 2017 e rapportnan aki a keda cla, pero, segun el a indica, e minister di turno e tempo ey no a tuma un decision, igual cu e minister cu a siguie tambe, cual tabata e minister encarga cu enseñansa prome cu Minister Croes.

El a sigui splica cu na aña 2020 a cuminsa cu e otro trayecto di e restructuracion di e Departamento di Enseñansa pa establece esaki pa e Instellingsbesluit. El resalta cu e restructuracion aki tin consecuencia financiero y lo move di 60 y algo empleado actualmente pa un maximo di 83 empleado y esaki ta bay costa casi 3.1 miyon florin structuralmente pa por tin un Departamento di Enseñansa completamente eficiente.

“E parti aki na luna di december 2023 a yega cerca mi, e concept rapportnan di e Formatierapport y Instellingsbesluit, a tuma decision riba esaki. A bay conseho di Minister cu esaki prome cu Pasco y a aproba e rapportnan aki. Desde 1 di januari 2024 Directie Onderwijs tin su Formatierapport y Instellingsbesluit nobo aproba,” el a indica.

Otro topico cu e mandatario a toca ta e e reunion recien cu e tabatin cu cabesantenan di scolnan di DPS. Durante e reunion aki, el a indica, e cabesantenan a bin cu nan puntonan di agenda y algun preocupacion cu nan a trece pa dilanti ta inclui por ehemplo interpretacion di BVVD, compensatiedagen, un problematica cu jubileum, scarsedad di personal, maestro di guia, entre otro.

Ariba esaki el a splica cu tin un comision estableci pa basta luna caba y e comision aki ta consisti di Directie Onderwijs, Inspectie Onderwijs, representante di tur directiva di scol y tur hunto ta yama Richtlijnen.

“Cada directiva di scol ta interpreta esaki na un manera diferente y pues a dicidi pa pone e comision aki hunto, laga nan traha y tur bay di acuerdo riba cada un di e puntonan aki di atencion cu nan a trece,” Minister Croes a señala.

El a agrega cu e palabracion cu tin cu e comision aki ta cu na februari e conseho final ta drenta unda tur 10 directiva di scol ta riba un liña tocante con e maneho y interpretacion di tur inkietudnan aki ta bay. Na momento cu firma esaki e ta drenta na vigor desde augustus 2024 unda na tur directiva di scol e ta wordo aplica den mesun direccion.

Un di e preocupacionnan cu a bin dilanti tambe di parti di e cabesantenan ta e grandura di e klasnan y Minister Croes a indica cu segun el a tende for di e comision encarga cu esaki, e grandura di klasnan lo baha na 24 mucha pa klas, algo cu a trece un alivio den e reunionnan.

Minister Croes a sigui splica cu otro punto cu a toca durante e reunion ta e structura di cuido y a duna splicacion ariba esaki na e cabesantenan y ta trahando duro ariba esaki pa bin cu un solucion structural.

Pa cu e tema di jubileum, cual tabata un punto di atencion tambe den e reunion aki, e mandatario a informa cu a splica e cabesantenan cu tin un proyecto na unda ya caba a detecta 137 persona cu lo ricibi un invitacion. E team cu ta realisando e proyecto lo otorga esaki na e 137 persona aki despues di carnaval pa trek recht locual tabata colga pa hopi aña.

Minister di Enseñansa a duna un actualisacion pa loke ta Juliana School. Manera ta conoci durante tratamento di presupuesto 2024 Parlamento a aproba 6.7 miyon pa un Juliana School nobo y den e caso aki a scoge e bario di Paradera pa diferente rason. El a indica cu a forma un team den december cu ta consisti di DOW, DIP, Ministerio, team di arkitecto, entre otro, y a bay haci bishita na e luga unda e scol ta bay wordo construi.

Segun e minister a informa pa otro siman ta bay tin e prome diseño di con e scol ta bay ta y asina cu tin confirmacion cu esey lo bira e diseño, e team cu ta bay traha riba esaki ta cuminsa traha pa asina mas tarda fin di maart tur cos por ta cla pa destaho y e meta ta cu pa fin di april e gunning por tuma luga y construccion cuminsa na mei di e aña aki.

Por ultimo, Minister Croes a elabora ariba e tema di normbedrag. El a splica cu e normbedrag ta hancra den ley y ta e compensacion cu directivanan di scol ta ricibi a traves di “exploitatiesubsidie”.

E normbedrag ta cubri costo di, entre otro, mantencion y seguro di e edificio di scol y lokaal, limpiesa di edificio y lokaal, coriente, awa y gas, mantencion di mueble di e scolnan, inversion den material di desaroyo “hulpmiddel” y necesidadnan di scol, material di les y administracion.

El a indica cu e directivanan di scol ta ricibi un suma cu hopi biaha ta miyones di florin, depende di e grandura di e scol, pa cubri tur gasto cu a ser menciona. E ley ta bisa cu cada tres aña mester calcula si mester aumenta e suma aki. E ultimo rapport oficial ta di aña 2009 y e ultimo aumento a tuma luga na aña 2010.

“Enseñansa tabata coriendo 13 aña atrasa encuanto e ahustenan necesario pa e normbedrag por ta actualisa. Den aña 2023 un team di experto cu ta compronde e materia a haci un investigacion y calculacion. Na final di e investigacion un rapport a keda presenta, unda cu a indica cu mester haal in e suma di 6.4 miyon florin,” e mandatario a enfatisa.

El a remarca cu dia 4 di september 2023, den e tratamento di voorjaarsnota, Parlamento di Aruba a aproba 50%, esta 3.2 miyon florin. Den luna di december aña 2023, ora cu Parlamento di Aruba a trata Presupuesto di Pais Aruba a aproba e otro 50%, esta 3.2 miyon florin, cual ta cera un total di 6.4 miyon florin pa haal in te cu aña 2023.