Mediante un carta publica riba su red social, ex-candidato di partido RED Democratico, Kinsasha van der Bliek a duna di conoce cu Gobierno di Aruba a apela e sentencia di su caso di dia 8 di januari ultimo, den cual a sigura cu Gobierno no ta di acuerdo cu e consideracionnan huridico.

E apelante den caso aki, Gobierno, a solicita un oportunidad pa complementa ainda mas e motibonan di apelacion den un periodo rasonabel cu ta bay ser determina, segun e carta ta indica.

Por a recorda cu mediante un decreto ministerial di 7 di juli di 2018, ex-minister di Enseñansa, Ciencia y Desaroyo Sostenibel hunto cu Minister di Husticia, Siguridad y Integracion a dicidi di pone Kinsasha van der Bliek na disposicion di e gabinete di e minister di Enseñansa mientras Gabinete Wever-Croes I tabata permanece den Gobierno.

Dia 20 april 2021, Van der Bliek a haci un publicacion unda por a tuma nota cu e tabata huma “algo.”

Den un carta di dia 18 di augustus 2021, Van der Bliek a ricibi un carta na unda a pidi’e pa contesta di manera escrito e supuesto incumplimento cu el a comete. Van der Bliek a contesta e carta dia 24 di september 2021.

Mediante e decreto nacional di 25 di mei 2022, gobierno a dicidi impone un sancion disciplinario, na unda tabata acusa Van der Bliek di a publica “Live” un video riba rednan social den cual ta parce tabata cende y huma un sigaria similar na un (join di marihuana), den e video ta anima su siguidonan of esnan cu tabata wak e live pa uni na e “revolucion” y no obedece.

Pa orden di 27 di juli 2022, presidente di Beoordelingscommissie Vrijwillige a dicidi duna na Van der Bliek e retiro cu efecto for di dia 1 januari 2023.

Evaluacion di hues

Maske Van der Bliek a bandona boluntariamente su trabou, e por bay back na su trabou despues di cinco aña. Tambe a confirma cu gobierno den e caso ta indica cu un sancion disciplinario ta permanece den Van der Bliek su file personal y lo por afect’e negativamente den futuro si e lo kier bay back den servicio publico.

Segun un hurisprudencia, pa constata e no cumplimento di Van der Bliek su debernan pa por duna luga na imposicion di un sancion disciplinario, ta necesario cu, riba e base di datonan disponibel y debidamente estableci, lo yega na conviccion cu e funcionario aki a comete un conducta di e cual e ta acusa.

E consumo di cannabis no ta ser discuti ya cu ta contra e articulo 4, inciso 1 di Landsverordening verdovende middelen (Lvm). Ta evidente cu 20 di april di ta Dia Internacional di Marihuana y cu Van der Bliek a duna e impresion cu tabata huma un join di cannabis y tambe a haci comentarionan riba su legalisacion na Aruba, corte ta considera cu no tin suficiente pruebanan cu Van der Bliek tabata realmente humando cannabis, sinembargo, tur ta parce indica cu si e tabata haciendo esey, cu su conducta, el a stimula of fomenta consumo di cannabis, y por lo tanto esey ta contra ley.

Ora el a haci’e segun corte, e no a comporta su mes manera ta coresponde pa un bon funcionario publico y gobierno tabatin derecho di impone un sancion disciplinario na Van der Bliek.

Sinembargo, esey no ta suficiente grave como pa impone un sancion disciplinario di retiro di trabou, aunke ta condicional. A tene na cuenta cu e tabata pertenece na e momento ey na un partido politico, cu ta haci impulso di legalisacion di cannabis, por lo tanto su conducta mester considera como parti di su actividadnan politico y ehercicio di libertad di expresion cu den e limitenan, tambe ta coresponde na funcionarionan publico. Hues W.C.E Windfield a anula e decreto nacional.