Awe nochi, prome minister di Aruba a confirma tres caso positivo di COVID-19; den total tin 12 persona cu a wordo contagia cu COVID-19. Ademas tambe el a anuncia cu tur bar y restaurant desde mañan lo mester cera su portanan pa publico.
El a informa cu e tres caso nobo ta personanan local, un di nan a bin cu e virus for di Colombia y otro dos ta transmision local, nan ta den un bon estado di salud. Riba edad di e pashentnan afecta, prome minister presidente a informa cu nan tin entre 22 pa 67 aña.
E aumento aki, minister presidente a menciona cu nan a bira mas agresivo pa loke ta trata ‘testmento’. Asina mes el a manifesta cu ‘e virus ta plamando bou di nos’.
Tambe el a informa cu nan a tuma e decision di cera tur bar y restaurant na Aruba, desde mañan 24 di maart, nan solamente por ta habri pa cuminda take away, delivery of drive thru den dia y mester cera 8or.
Otro anuncio cu prome minister a haci ta cu orario di ciere pa tur establecimento tambe ta 8or, gasolin station so por keda habri te 9or.
