Un di e temanan trata durante e Conferencia di Prensa di Gobierno di Aruba diahuebs mainta, ta e prome aumentonan cu a duna na empleadonan publico y DPS.
Segun un comunicado di prensa, gobierno ta hibando un bon maneho financiero y pa e motibo ey por a crea e espacio financiero pa e alivio pa e empleado publico cu desde aña 2018 no a haya un indexering di salario, y na juli 2024 e empleadonan publico, incluyendo DPS (Dienst Publieke Scholen) a haya loke e comunicado a yama nan merecido indexering.
Prome Minister Evelyn Wever-Croes ta indica cu ta trata di un total di 4298 persona cu a haya un aumento di salario di 6% na juli 2024, y na januari 2025 nan lo haya e otro parti di e aumento cu ta di 5.7%. Gobierno a aloca 21.1 miyon florin pa e aumento di aña 2024 y pa e aumento di aña 2025, Gobierno lo mester aloca mas di 65.1 miyon florin.
Na april di e aña aki, Gobierno y sindicatonan SADA, Simar, SPA, Seppa, FTA, Simba, y TOPA a yega na un acuerdo pa indexering di sueldo di empleadonan publico y ‘gelijkgestelden’ cu for di 2019 tabata pendiente. Nan a splica cu a basa esaki den e cifranan di inflacion di e periodo di 2018 te cu aña 2023. E cifra di inflacion ta basa den un promedio anual indice di indice prijs di consumo di e periodo aki, cu tabata di 16.8%.
E cifra cu a logra acorda entre Gobierno y sindicatonan pa pago di indexering ta di 11.7% di e perdida di forsa di compra den salarionan di empleadonan publico pa periodo di 2018 te cu 2023.
