Gobernador a caba di tuma e decision pa retira señora drs. M.J. Lopez-Tromp for di su funcion di minister entrante awe. Conseho di minister a bay di acuerdo riba 21 di october 2020 cu retiro di e minister di Desaroyo Teritorial, Infrastructura y Medio Ambiente.
A tuma e decision na interes di continuacion di Gabinete Wever-Croes, cu bista riba e retonan extraordinario cu Aruba ta enfrentando. Funcionamento di e gobierno tawata na peliger como cu no por a garantiza unidad di e maneho gubernamental. Tanto pa e ministernan conhunto como pa cada minister individual ta di importancia pa, en cuanto e maneho di gobierno, nan ta riba e mes un liña y cu nan ta propaga of por propaga e liña ey.
Reaccionando riba e carta cu Gobernador a manda awe merdia pa Presidente di Parlamento, unda cu a pidi pa e huicio di Parlamento, Parlamento a indica cu un mayoria no tin obhecion contra e intencion pa retira minister Lopez-Tromp. Gobernador a dicidi tambe di encarga señora mr. E.C. Wever-Croes, minister di Asunto General, Integridad, Maneho Aparato Gubernamental, Innovacion y Energia cu direccion di y responsabilidad pa e ministerio di Desaroyo Teritorial, Infrastructura y Medio Ambiente
