Gobernador Fredis Refunjol a tuma despedida di parlamento ayera unda el tene un discurso. Esaki tabata enfoca riba e importancia di educacion cual ta un aspecto cu den su trayectorio como gobernador, Sr. Refunjol semper a boga p’e Tambe el a mustra riba e rol independiente di e parlamentarionan, den sentido independiente di gobierno.
“Como representantenan di pueblo eligi, ta boso tarea pa independientemente, a base di boso propio formacion di huicio y criterio y a base di boso consenshi, pa haci escogencianan. Tal manera nos Gobernador Interino a observa durante aceptacion di su funcion dia 7 di november ultimo, ta Constitucion di Aruba ta e guia principal.”
“Señora Presidente,den otro discursonan mi a papia riba esaki caba, nos tur aki presente tin un tarea ehemplar pa nos pais. Esey ta nifica cu nos – den nos trabou cotidiano – mester actua como “role-modelnan”. Sin duna nos propio interesnan preferencia, riba e interes colectivo di e pueblo. Y esaki door di comportacion integro, pa anda cu otro cu respet. Pa supera cuestionnan individual y pa conduci discusionnan riba contenido y no riba e persona.”
E gobernador a sigui cu: “Pueblo a eligi boso pa controla y pa sigui den forma critico, e maneho di gobierno, y pa aproba of desaproba legislacion. Pa boso tarea boso a haya autorisacion y e medionan necesario. Uza nan bon y uza nan den forma corecto. Mi ta pensa por ehempel riba boso derecho di modificacion (amienda) y riba boso derecho di iniciativa. Si boso, por ehempel, unanimamente, – y los for di boso color politico – acepta un mocion, anto ta boso tarea pa percura tambe, pa wordo ehecuta.”
Educacion
Sr. Refunjol tambe a enfoca un biaha mas riba e importancia di educacion. Ora e ta baha como gobernador su intencion ta pa keda sostene e causa aki den un of otro forma, pues sigui educa e generacionnan siguiente.
“Señora Presidente, lo no straña bo, cu ami como ex docente y como ex minister di Enseñansa, ta kere sagradamente den e oportunidadnan cu nos por crea pa nos pais cu bon educacion pa nos yiunan y nos nietonan. Den un mundo cu tur ora bay ta bira mas chikito, den un mundo den cua desaroyonan ta bay mas lihe y den cua fronteranan ta medio disparce, ta esencial cu nos ta prepara nos hobennan pa oportunidad- y posibilidadnan cu ta surgi.”
“Bon educacion, accesibel pa un y tur, ta percura pa prosperidad y un convivencia duradero y pacifico. Politicamente mira, enseñansa no ta un expediente facil. Fuera di cu enseñansa ta exigi inversion, hopi inversion, riba plaso largo. Enseñansa ta costa hopi placa, sin cu bo ta mira resultado den e proximo eleccion.”
‘Inversion los di realidad politico diario’
Gobernador Refunjol ta haya cu ‘inversion den enseñansa ta exigi un postura duradero riba termino largo, los di e realidad politico diario’ .”Bon enseñansa ta exigi esfuerso grandi, vision y escogencianan bon pensa di gobiernonan, pero enfaticamente tambe di Bo Parlamento, como e representacion mas halto di pueblo di Aruba.”
