Gobernador: ‘Nos mester surpasa nos propio ego’

Den su discurso tradicional gobernador di Aruba a pone enfasis riba e importancia di crea un comunidad cu ta traha pa su bienestar colectivo en bes di selectivo y individual.

“Nos mester surpasa nos propio ego y duna prioridad na e necesidadnan di nos sociedad y di nos futuro generacion. Nos proposito no ta wordo determina door di destino, sino door di conviccion y di direccion. Ora nos combina sentido comunitario cu compromiso, nos ta yega na e cumplimento di nos proposito, caminda cu nos bienestar colectivo ta wordo teni mas halto cu e bienestar selectivo. Nos no ta wordo mara door di nos pasado, cada un di nos ta un lider, un mayordomo di nos futuro, den amor, paz y felicidad conhunto. Nos tin e yabi den nos, den nos man!”

Gobernador Alfonso Boekhoudt ta pidi pueblo pa tuma e tempo awor pa refleha ‘ariba unda nos ta como un pueblo pa dicidi kico mester bay otro’. “E celebracion di Pasco ta representa luz cu ta briya den luga scur, pero cu na mes momento ta e simbolo di un bida nobo, di un comienso nobo y di oportunidadnan nobo. Mi ta aprecia masha hopi mes cu na Aruba tambe tin hende cu ta cuminsa cu accionnan nobo y positivo y sa di persisti den haci loke ta bon y corecto. Mi ta pensa ariba p.e. tur e fundacionnan, asociacionnan boluntario y di deporte, di scouting, di cultura y pa otro metanan noble. Asina nos por ripara cu tin un coriente nobo di esunnan cu ta haci hopi esfuerso pa proteha nos naturaleza, nos flora y nos fauna. Pero e aña aki nos a wak hopi esfuerso tambe pa yuda esnan den necesidad, cu ta pafo di nos propio frontera.”

E ta sigui cu: “P’esey laga nos haci uzo di e energia positivo aki pa trece e cambio necesario den nos sociedad. En bes di pone e enfasis solamente riba compra di un kerstboom, kisas nos mester busca forma pa planta un mata, sembra simia di cuido, di compasion y fraternidad. Mi ta sigur cu e ora nos lo cosecha tur hunto; un sociedad mucho mas sostenibel y husto. Laga nos demostra cu nos a ricibi e señal cu na Aruba e prioridadnan mester cambia pa renoba nos pais for di paden, for di su principio y balornan.”

Na comienso di su discurso e gobernador ta pone atencion riba e fenomeno di consumo cu segun su reflexion ‘ta guia nos sociedad, en bes di compasion’. “Nos ta alimenta nos curpa y nos ego, y ta briya cu nos pertenencianan nobo cu ta lombra; mientras cu loke ta duradero y eterno no ta comemento y bebemento, sino husticia, paz y gozo, pa tur hende.”

Den su discurso e gobernador ta indica ta motibo di esey nos ta puntra nos mes:

• den tur e presion di bida y di trabou, e por ta asina cu nos a perde e berdadero espirito di Pasco? Di nos comunidad? Di cuida otro? Di compasion? Di fraternidad?

• Nos por ta asina ocupa cu nos mes cu nos por neglisha criaturanan di 3 of di 5 aña cu ta sufri abuso?

• Of un mama di 15 aña cu ta busca ayudo pa su tres yiunan?

• Of un hoben di 35 aña cu ta purba suicida su mes pa causa di depresion mental?

• Nos ta asina ocupa pa alimenta nos necesidadnan egocentrico cu ta cumbini nos lubida pa atende un mama di 65 aña cu ta sufri di demencia?

• Of ta lubida e welo di 75 aña cu ta decai solitario sin mira su nietonan pa mas di 2 aña?

• Nos ta stima suficiente pa no solamente laga nos bos resona, sino tambe pa para pa esunnan vulnerabel y sin bos den nos comunidad y pa nos ecologia?

• Nos ta compadese y empatisa cu esunnan cu lo lanta Pasco mainta sin kerstboom, sin regalo, sin awa, sin coriente, sin trabou of sin amor?

Con mester celebra Pasco si tur esakinan ta sosode riba nos isla?

“E preguntanan aki ta pone nos realisa cu nos ta biba den un realidad inconveniente cu ta pone nos sinti un tiki incomodo. Pero e intencion tras di haci mencion di nan, ta pa pone nos para keto un rato y refleha, aunke siera pa e momento aki. E ex-president Mericano John F Kennedy a bis’e cu e siguiente palabranan: conformismo ta e enemigo di crecemento y e ta e carcelero di libertad. Si nos conforma cu esaki ta nos realidad y cu nos no por cambi’e, nos lo no por crece como sociedad y nos lo no por ta liber”, asina e gobernador ta bisa.

Raiznan historico
Gobernador Boekhoudt ta haya cu ‘e falta di cuido cu stimacion, di compasion y di fraternidad, den e berdadero espirito di Pasco, no ta algo cu a bay perdi di un dia pa otro’. “E tin su raiznan historico den e desaroyo y evolucion di nos pais cu ta relativamente hoben. Pero loke ta mas importante ta cu e ehempelnan menciona di bida real, cu tin di haber cu abuso, negligencia, adiccion y decaida di nos comunidad, ta solamente simptomanan y señal di con profundo nos ta desconecta di loke nos kier para pe.”

“Pa mas di mita siglo, Aruba ta bou di e efecto cada biaha mas grandi di ta desconecta (no solamente di nos balornan sino tambe) di nos ecologia, desconecta di nos recursonan natural, di nos flora y fauna indigeno, tanto riba tera como den laman. Nos ta gastando y degradando nos naturaleza ariba un escala creciente. Nos ta uza mas recursonan cu no ta renovabel y ta produci mas desperdicio tur aña.”

Consumi di mas
E gobernador tambe ta duna un par di cifra riba e consumo cu ta di mas riba nos isla. “Aunke nos ta solamente un isla chikito, nos ta consumi por lo menos 1,4 biaha mas tanto di su capacidad. Esaki ta nifica, cu actualmente nos ta uza por lo menos 40 porciento mas recursonan natural di loke e isla por produci y regenera. Bayendo pa riba 2 miyon bishitante pa aña riba nos isla ta pone cu e presion lo solamente sigui crece, no solamente pa nos ecologia, sino tambe pa nos sociedad.”

Sr. Boekhoudt ta conclui den su discurso tambe cu nos comunidad ta structuralmente desconecta.

‘Mescos cu nos consumo exagera di nos ecologia y recursonan natural ta pone cu nos ta crece mas y mas desconecta di nan, asina tambe nos ta mustra di ta desconecta di nos recursonan humano, nos hendenan, y di nos recursonan cultural.”