Despues cu e prome buelta pa yega na un Gobernador nobo, ta parce cu e di dos intento aki tambe por fracasa. Den e prome intento di luna pasa, Hulanda no a keda mucho contento cu e hecho cu nomber di candidato tabata tur caminda, y pio ainda e candidatonan mes, no tabata sa di abstene di papia riba e tema, confirmando candidatura. Aparentemente nos tin hende aki cu no por o no kier comprende kico ta e ambiente propicio pa yega na nombra un Gobernador.
Loke no mester en todo caso ta un ambiente mas bien (di campaña) di eleccion, y no di seleccion discreto manera e mester ta. Ta di comprende cu algun di nos lo argumenta cu tur cos den gobernacion di e pais mester sucede den luz publico, pa por tin mayor claridad riba e asunto. En general esey ta berdad, pero den e caso di yega na nombra un Gobernador, no ta asina. E motibo ta cu e Gobernador mester bira e prome ciudadano di nos pais, cu mester haya bao di tur circunstancia e maximo respet di nos tur. Ora ta trata di un comunidad chikito manera di nos ta facil pa cay den e trampa di actitud demasiado familiar pasobra nos a siña conoce e persona cu ta bira Gobernador di cerca den ambiente di scol, bario o famia. Anto ta djis un stap mas leu pa trece anecdota dilanti cu ta tira un luz menos bunita riba e persona, pero cu no ta asunto transcendental cu por hunga un papel den e evaluacion cu ta haci di e carera profesional y di conducta civico di e candidato. Ora cu yega na final pa nombra un persona, cu a pasa den tur un proceso publico, di aprecio di un banda, pero tambe di ser lastra pa contrincante, ta bira hopi mas dificil pa logra e nivel di respet general bao di tur circunstancia cu e Gobernador nobo mester haya di nos tur.
Esaki a bira mas importante ainda desde cu pa prome biaha a selecciona un (ex)politico pa e puesto. Esey ta un decision cu a tuma luga realmente cu aprobacion di e partido politico grandi den oposicion e tempo ey cu awe ta den gobierno. No tabata trata di un asunto di principio, un politico si of no den e puesto di Gobernador, sino mas bien e aceptacion cu e politico particular di e momento ey, nos actual Gobernador. Tabata trata di un persona aprecia pa un y tur pa su actitud semper gentil, diplomatico y civilisa. Cu otro palabra, el a gana e respet necesario prome cu el a drenta e puesto di Gobernador, y no a decepciona nos tampoco, cu excepcion di esnan cu a haya necesario pa bay tene accion y menasa dilanti su oficina, faltando respet completo pa e instituto Gobernador. Y no tabata trata di hende sin conocemento, sino di varios graduado di un facultad di ley. En todo caso pa hopi hende e tabata un bon experiencia con NO mester atende e asuntonan aki.
Bisando esey anto ta bira mas importante pa hiba e proceso pa yega na nombra un Gobernador na e manera corecto. Kico esey ta significa? Cierto grado di discrecion, tambe di prensa. Esaki significa anto cu prensa no por busca pa sa nomber di e candidatonan? Prensa semper tin e derecho di busca informacion, pero ta esnan envolvi den e proceso mester sa di keda keto y laga e proceso aki tuma luga den e ambiente di discrecion necesario. Ademas cu e ta un asunto di Reino na prome luga, y no un asunto di nos na Aruba pa dicidi den un ambiente di polemica politico. Y ta na esey nos a yega: gobierno parce cu tin tres candidato di nan color politico, y e partido grandi den oposicion ta declara cu nan tin sigur candidato cu ta mes bon o miho pa bira Gobernador. Asina nos a bin cay hustamente den e ambiente negativo pa logra cu Reino ta nombra un representante di Rey na Aruba, cu na cada ocasion oficial, cada hisamento di bandera y tocamento di nos himno nacional, mester ta cu su presencia, e expresion maximo di nos union y harmonia, como pueblo. Nos no ta logra esey si na moda di papia, e persona en cuestion, ken cu e resulta di ta, te dia di su nombramento ta ser lastra publicamente.
Den nos historia cortico como pais nos conoce momentonan tremendo di union ora tabata necesario. Manera prome cu 1996 cu Aruba formalmente mester a bira independiente, pero tur hende tabata di acuerdo cu e fli ey no tabata bay subi. Un delegacion di gobierno y oposicion a ‘asalta’ Lubbers na Curaçao pa pone bon cla cu pueblo di Aruba no tabatin ningun intencion pa entrega su paspoort Hulandes. Un mensahe bon cla pa e par di hende cu por ta soña ainda cu independencia. Lamentablemente awe nos no ta mustra nos banda mas noble, net na momento cu esey ta mas al caso cu nunca. Nos NO ta den campaña pa nombra Gobernador!
