Discurso ta un alabansa continuo na actual gabinete

Tin cierto aspecto di e oposicion di gobernador cu no ta facil ni agradabel. Un di e tareanan menos atractivo pa su persona ta lesa e discurso na apertura di Staten, cu ta refleha pensamento di gobierno, y no e opinion di e prome ciudadano di nos pais. Na cierto ocasion esey ta diferente, manera algun aña pasa cu henter e fraccion di e partido den gobierno a bin bisti di luto, pasobra Hulanda (Reino) aparentemente a podera di e discurso, cu cual e gabinete tabata totalmente den desacuerdo. E audiencia no por a kere ora nan tabata tende e gobernador di e tempo ey lesa un texto cu tabata anuncia medida concreto, entre otro di cortamento drastico den gastonan di personal. E cortamento aki nunca a mira luz di dia y te awe e actual gobierno ta lidia cu e consecuencia di e problemanan financiero cu nan mes a crea.

A haci uzo di e oportunidad pa alaba tambe e 17 metanan defini pa Nacionnan Uni pa desaroyo sostenibel, y e intencion cu e gabinete tin pa implementa nan. Nos ta bisa intencion pasobra ta te ey nan a yega tambe. A bolbe referi na e 16 areanan di proteccion ambiental special, sin cu te awe a concretisa esaki riba papel, cu excepcion di e discursonan manera esun di ayera, unda ta keda ripiti e intencion.

E discurso tabatin su sorpresa tambe. Manera e pregunta kico gobierno ta bay bisa di presupuesto 2018 y e intencionnan pa cu maneho di e aña ey, a haya un contesta simpel nada. Loke ta straño, pasobra normalmente gobierno mester laga gobernador conta kico ta nan plannan pa e aña entrante. No e biaha aki anto. Ni sikiera a gaba e cosnan remarcabel cu a caba di sali den corantnan. Manera e anuncio cu e partido den gobierno tin pensa pa bay traha 2000 (dos mil) vivienda… Por ta cu toch nan a haci caso di e critica constante di oposicion y di medionan di comunicacion, cu den ocho aña nan no a ni traha un cas, ni desaroya maneho pa vivienda popular. Pues bon noticia, Aruba: nos tin dos mil cas na caminda. Ken ta bay paga nan, esey ta otro storia.

Di otro banda, si a gaba e presupuesto 2017, cu supuestamente ta bay tin un deficit dentro di e margen di 0,5% di GDP, estableci pa ley di CAft. Lamentablemente na e momento aki caba tur hende cu dos duim di frente sa cu tur e entradanan exagera tabata basa riba un rehabilitacion di e refineria cu lo tabata den full swing, cu mas di 2000 hende na trabao, loke no ta e caso, cu consecuencia cu ta surgi un deficit cu lo ta por lo menos 3% di GDP (alrededor di Afl. 150 miyon), pero por ta hasta mas cu esey.

Loke mas a falta den e discurso di gobernador di gobierno anto ta referencia na loke mas ta tene nos comunidad den suspenso, y esey ta e falta grandi di claridad encuanto transparencia y integridad den henter gobernacion. Na momento cu gobernador ta expresando un discurso pa gobierno cu tabatin un referencia chikito, den otro contexto, na integridad di servicio publico, Hues Comisario tabata tuma e decision pa extende e detencion di ministro Croes y un di su ayudantenan, cu 60 dia mas. Hues Comisario a yega na e conclusion ey, aceptando posicion di Ministerio Publico, cu tin hopi evidencia cu ta indica cu e ministro y su alrededor a haci nan mes culpabel na henter un lista di delito, di exigi o acepta soborno, labamento di placa, sustra cion, falsificacion y trafico di persona.

Ningun palabra di con gobierno ta consciente di e hecho cu tin corupcion na grandi den gobernacion y cu mester cuminsa atende e problemanan aki. Esey no ta haci traves di menciona e palabra transparencia o integridad de bes en cuando, pero mester cuminsa coregi e cosnan cu a conduci na e tentacion, y seguidamente e caida di e colega ministro. Pa no papia mes di e hecho cu e persona ta sigui den funcion y no a tuma e decision pa renuncia, no pasobra e ta condena, esey hues ta dicidi despues, pero pasobra e mes ta responsabel pa laga e asunto yega asina leu.

E caminda cu e mandatario den problema y su coleganan di gabinete a scoge, ta uno di creciente berguensa, segun cu e proceso ta bira largo y ta sali na cla, cu no solamente tabatin caba un monton di evidencia pa convence Hues Comisario pa aproba e 13 peticionnan pa invasion di cas y oficina, y menciona e ministro desde inicio como e cabes di henter e operacion criminal aki, pero cu e ultimo lunanan, cu interogacion di decenas di persona, como testigo o como sospechoso, a resulta den detencion prolonga, y e prome mencion di un posibel tratamento di e caso pa fin di aña. En todo caso, e ministro no lo t’ey pa festeha den e paradanan electoral y no por aparenta inocente meymey di su coleganan. Ta bon.