(AP) — Gobernador Republicano di Texas, Greg Abbott ayera a aproba podernan nobo cu ta permiti polis aresta migrantenan cu crusa frontera Mericano ilegalmente, y ta duna huesnan local autoridad pa duna orden pa nan bandona e pais, pushando e limite di con leu un estado por bay pa forsa cumpli leynan di inmigracion.
Oponentenan a yama e medida e intento mas dramatico di un estado pa controla inmigracion desde un ley di Arizona na 2010 – denuncia pa criticonan como e ley “Mustra Mi Bo Papelnan” – cu a keda en gran parti rechasa pa Corte Supremo Mericano. Cumplimento di inmigracion ta un responsabilidad federal, y e ley di Texas probablemente tambe ta bay enfrenta retonan legal pronto.
E ley ta permiti un agente di cumplimento di ley di Texas aresta hende cu ta sospecha di drenta e pais ilegalmente. Unabes den custodia, nan por sea bay di acuerdo cu orden di un hues di Texas pa bandona Merca, of keda enhuicia pa cargonan di delito di entrada ilegal. Migrantenan cu no por bay por enfrenta aresto atrobe bao cargonan mas serio.
Abbott, kende a firma e ley nobo dilanti di un seccion di e heki na frontera na Brownsville, a pronostica cu e cantidad di hende crusando ilegalmente den Texas lo reduci pa “hopi mas cu 50%, talbes 75%.”
“E consecuencia di dje ta asina extremo cu hende cu ta ser contrabanda pa e cartelnan, nan no ta bay kier bin den estado di Texas,” Abbott a bisa.
Republicanonan na Texas a keda reta autoridad di gobierno Mericano riba inmigracion, bisando cu administracion di presidente Joe Biden no ta haciendo suficiente pa controla e 3,149 kilometer di frontera sur. Texas a manda mas 65mil migrante riba bus na varios ciudad na Merca desde augustus 2022, y recientemente a instala waira di sumpiña na canto di Rio Grande, cu a atrapa y herida algun solicidante di asilo.
Gobierno Mericano ayera temporalmente a shut down dos crusada di frontera riba spoor di trein na Texas pa yuda oficialnan procesa migrantenan. Operadornan di trein a bisa cu e ceramento na Eagle Pass y El Paso lo afecta comercio prome cu Pasco.
Troy Miller, acting commissionner di Aduana y Proteccion di Frontera Mericano, a bisa cu autoridadnan ta mirando yegadanan “sin precedente” na e frontera, surpasando 10mil crusada algun dia e luna aki. Ceramento di e spoor ta un respuesta na mas migrante biahando riba trein di carga, particularmente den ultimo siman.
Expertonan legal ta bisa cu e medida nobo na Texas ta viola e competencia di gobierno Mericano riba cumplimento di inmigracion, y Union di Libertad Civil Mericano di Texas a bisa cu lo reta e medida den corte.
Mas cu 20 Democrata den Congreso tambe a firma un carta urgiendo Departamento di Husticia pa demanda pa stop e ley, conoci como Senate Bill 4.
Gobierno Mexicano tambe a rechasa e medida. Bao acuerdonan bilateral y internacional, Mexico ta rekeri pa acepta deportacion di su propio ciudadanonan, pero no esnan di otro pais. Bao ley di Texas, migrantenan cu haya orden pa bandona e pais lo ser manda na puntonan di entrada na e frontera cu Mexico, hasta si nan no ta ciudadanonan Mexicano.
Oponentenan a acusa Republicanonan na Texas di usa e ley como un vehiculo pa forsa e mayoria conservador nobo den Corte Supremo pa revisa su decision di 2012 na Arizona. E tempo aya, hues Anthony Kennedy a bisa cu Arizona por tin “frustracion comprendible” cu migrantenan cu ta na e pais ilegalmente, pero no por busca politicanan cu ta “mina ley federal.”
