Mas di dos siman despues cu e tormenta publico a cuminsa na nivel nacional como internacional, pa e contrato cu e empresa Mericano Whitefish, cu lo mester a tuma na su encargo restaura e red di energia electrico di Puerto Rico, gobernador Rosselló a anuncia ayera den un rueda di prensa cu el a ordena e cancelacion di e contrato cu e compania. E compania a resulta di tin solamente dos empleado, y por lo tanto lo mester a contrata tur demas personal y servicio. Gobernador Rosselló a pidi e hunta di e Autoridad di Energia Electrico (AEE) pa nan invoca di inmediato e clausula di cancelacion di e acuerdo, cu te na e momento aki a costa caha publico di e isla como US$ 11 miyon.

“A raiz di e informacionnan cu a sali y cu e obhetivo di protege interes publico, como gobernador, mi ta solicitando na Hunta di Gobierno di AEE pa nan procede na invoca e clausula di cancelacion di e contrato di e empresa Whitefish Energy inmediatamente,” el a anuncia ayera lesando un documento desde e podio cu e tin custumber di usa pa su conferencianan di prensa.

Ademas, Rosselló a anuncia cu e lo designa un representante den e Division di Compra y Suministro di AEE, di acuerdo cu Ley 5 di 2017 di Emergencia Financiero y Responsabilidad Fiscal di Puerto Rico.

A pesar di e cancelacion di e contrato, ainda ta keda interogante serio con e contratacion por a tuma lugar, riba cual e gobernador ta insisti, riba pregunta di prensa, cu e no a ser consulta.

“No a consulta mi riba e contrato aki. Y ta awor mes cu e Autoridad mester asumi su papel. Nan tabatin e podernan di emergencia. Nan tin nan hunta di supervision, nan ta consulta cu e hunta y tur hende mester haci nan trabao,” el a declara, refiriendo na e orden ehecutivo cu a aproba despues di e paso di horcan Maria, cu a flexibilisa e contratacion debi na e emergencia.

AEE a pacta cu Whitefish Energy pa US$300 miyon y na un tarifa cu ta resulta hopi mas caro cu si a haya ayudo di American Public Power Association (APPA), un asociacion di entidad productor di energia, di cual AEE ta ademas miembro.

E director ehecutivo di AEE, Ricardo Ramos, y Andrew Techmanski, fundador di Whitefish, no por a precisa ki momento a emiti e convocatorio pa e otorgamento di e cuantioso contrato. Ramos a bisa cu el a opta pa emiti un convocatorio y no un subasta pa selecciona e empresanan pa e restauracion di e sistema energetico cu a collaps despues di horcan Maria.

El a bisa cu e reglamento di e corporacion publico ta permiti di haci un convocatorio directo na momento di emergencia, pero no a presenta e documentonan di e otro companianan cu tabata interesa den un convenio cu Puerto Rico.