Entrante otro siman, Gobernador di Guajira (Colombia) Wielder Guerra lo ta realisando un bishita di trabou na Aruba. E anuncio aki a wordo haci pa director di Fundacion Rancho, Clifford Rosa, kende a laga sa cu e bishita aki ta coincidi cu e siman cu e fundacion aki ta celebrando 7 aña di existencia.
Sr. Guerra ta un investigado antropologo bon amigo di Aruba kende a yega di presenta su ultimo buki “El Mar Cimarron” na Museo Arkeologico di Aruba, aña pasa. Recientemente presidente Colombiano Juan Manuel Santos a dicidi pa sr. Guerra kende no ta politico lo ta encarga cu gobernacion di Guajira te ora cu un eleccion nobo lo tuma luga den e departamento Colombiano aki.
Sr. Rosa a cualifica e bishita aki como uno unico cu ta habri hopi posibilidad pa fortalece entre otro e lasonan comercial historico entre Aruba y Guajira. E relacion aki a cay hopi pero esfuersonan ta wordo haci pa e por reactiva. P’esey e ta haci un yamada na e gremio comercial di Aruba pa probecha e bishita aki y asina formula tur nan preguntanan y inkietud cu nan tin riba e tereno aki. Sr. Rosa a declara cu e Gobernador lo bin cu un delegacion y nan ta personanan cu ta forma parti di su gabinete. Tambe lo bin representante di Camara di Comercio di Guajira.
E presencia di Gobernador di Guajira lo yuda fortalece algun proceso cu ta bin tumando luga riba tereno cultural y comercial cu fundacion Rancho ta bin promoviendo ultimo tempo. “Gobernador ta bin pa sondea y concretisa cierto desaroyonan cu ta biniendo”, el a bisa. Den principio nan ta bay informa Camara di Comercio di Aruba (KvK), pero esaki ta parti di e trabou diplomatico relaciona cu e bishita aki y cu nan ta laga den man di departamento di Relacion Exterior y departamento di Cultura di Aruba. Nan ta trahando ariba e agenda aki, considerando cu e bishita aki ta coincidi cu un fin di siman cu tin actividadnan nacional y dianan festivo.
Fundacion Rancho ta fungi como intermediario pa facilita e bishita di Gobernador di Guajira y tambe lo traha un agenda di nan actividad riba nos isla. “Pa asina ey e por bira un bishita hopi special pa e comerciantenan y e comunidad Guajiro na Aruba. Tambe tur interesado y tur investigado”, segun sr. Rosa.
E ta informa cu e prome encuentro cu Gobernador di Guajira lo ta riba dia festivo di Rey, kiermen 27 di april, unda e lo sostene un reunion cu departamento di Cultura (DCA) pa “inicia un proceso”. Gobernador di Guajira lo ta hopi habri mirando cu lo tin mas actividad den cuadro di fundacion Rancho su 7 aña di existencia y esaki ta un parti di dje.
Tambe 28 di april nan lo organisa un encuentro na Museo Historico unda un invitacion general ta bay pa tur interesadonan. E dia ey Gobernador di Guajira ta bay trece informacion amplio pa comunidad di Aruba, y comunidad di Guajira tambe.
