Gobernador Lucille George-Wout ta nengando di coopera cu Gabinete Rhuggenaath su deseo di pidi un prestamo extra di 200 miyon Florin pa asina caba di construi e hospital nobo .
Gobernador di Corsou a presenta e Decreto Nacional dilanti Rey pa destrui e decreto den e forma cu el a keda presenta, mirando cu Gobernador ta haya cu e decreto ta bay contra e Ley di Reino riba Supervision Financiero (Rijkswet financieel toezicht). Conforme e proceduranan vigente, Raad van State lo mester conseha Conseho di Minister di Reino riba esaki.
Gobierno no ta di acuerdo cu Gobernador su punto di bista y a duna di conoce e punto di bista aki na Conseho di Minister di Reino y ora esaki yega na Raad van State lo haci esaki cla un bes mas. Ministerio di Salud, Medio Ambiente y Naturalesa mientrastanto a declara mediante un comunicado di prensa cu ‘e deber di defende Corsou su interesnan, cual ta inclui por brinda cuido medico adecua, ta exigi pa tuma e prestamo’.
E ministerio ta señala ademas cu lo tin consecuencianan financiero negativo ‘si mester keda mantene e hospital actual (Sehos) mientras ta mantene un hospital cu ainda no ta operacional (Curaçao Medical Center), cual lo trece gastonan y kehonan adicional’.
Por asumi cu Gobernador di Corsou, segun fuente Koninkrijksrelaties, lo a busca conseho di Ministerio di Asuntonan Interior y Relacionnan di Reino pa dicidi cu no ta bay di acuerdo y ta pone esaki dilanti Rey, desviando di loke ta normal, pues pa simplemente firma.
Un par di aña atras Hulanda a otorga un prestamo di mas o menos 400 miyon Florin, cu interes hopi abou. Sinembargo parce cu prome cu por presenta e hospital completa, tin mester di 200 miyon florin mas. Un asociacion comercial local lo ta dispuesto pa fia e placa.
