(AP) — California ta bay hacie ilegal pa plataformanan di rednan social cu conocemento duna feeds na muchanan sin permiso di mayornan, cuminsando 2027 bao di un ley nobo cu gobernador Gavin Newsom a firma diabierna.
California ta sigui estado di New York, cu a pasa un ley anteriormente e luna aki permitiendo mayornan blokea nan yiunan di haya sugerencia di post riba rednan social for di un algoritmo di e plataforma. Utah a pasa leynan den añanan recien cu meta pa limita acceso di mucha na rednan social, pero a enfrenta reto den corte.
E ley di California ta bay drenta na vigor den un estado hogar na algun di e companianan tecnologico mas grandi na mundo.
Propuestanan similar no a logra pasa den añanan recien, pero Newsom a firma un ley, e prome na e pais, na 2022 prohibiendo plataformanan online di usa informacion personal di usuario den maneranan cu por haci daño na mucha. Esaki ta parti di un empuhe cresciente den estadonan na e pais pa purba atende e impactonan di rednan social riba e bienestar di mucha.
“Tur mayor sa e daño cu adiccion na rednan social por haci riba nan yiunan – isolacion di contacto humano, stress y ansiedad, y oranan largo desperdicia te anochi,” Newsom a bisa den un declaracion. “Cu e ley aki, California ta yudando protege mucha y adolescente di caracteristicanan diseña intencionalmente cu ta alimenta e habitonan destructivo aki.”
E ley ta prohibi plataformanan di manda notificacion sin permiso di mayornan na menornan entre 12am y 6am, y entre 8am y 3pm riba dianan di siman for di september te mei, ora muchanan tipicamente ta na scol. E legislacion tambe ta obliga plataformanan pone e cuentanan di mucha priva pa default.
Oponentenan di e legislacion ta bisa cu lo por sin sa preveni adultonan di haya acceso na contenido si no por verifica nan edad. Algun ta argumenta cu por pone privacidad online den riesgo door di pone plataformanan colecta mas informacion di usuarionan.
Ley ta defini un “feed adictivo” como un website of app “den cual cantidad di pida di media genera of comparti pa usuarionan ta, sea concurente- of consecuentemente, recomenda, selecta of duna prioridad pa desplega na un usuario basa, den total of den parti, riba informacion duna pa e usuario of di otro manera asocia cu e usuario of aparato di e usuario,” cu algun excepcion.
E tema a haya atencion di nobo na juni, ora Ciruhano General Mericano, Vivek Murthy a haci un yamado pa Congreso rekeri label di advertencia riba plataformanan di rednan social y nan impacto riba hoben. Fiscal General na 42 estado a asostene e plan luna pasa den un carta manda na Congreso siman pasa.
Senador Nancy Skinner, un democrata representando Berkeley autor di ley di California, a bisa despues cu legisladornan a aproba e ley luna pasa cu “companianan di rednan social a diseña nan plataforma pa haci usuarionan adicto, specialmente nos muchanan.”
“Cu aprobacion di SB 976, Legislatura di California a manda un mensahe cla: Ora companianan di rednan social no actua, ta nos responsabilidad pa protege nos muchanan,” el a bisa den un declaracion.
