Gobernador di Aruba a huramenta cinco parlamentario nobo

Ayera mainta Gobernador di Aruba SE Alfonso Boekhoudt a huramenta cinco parlamentario nobo cu lo ocupa e asientonan di e parlamentarionan cu lo bandona nan rol den parlamento pa asumi nan rol como minister den gabinete AVP-Futuro.

Ayera mainta den e Cas Ceremonial di Gobernador Aruba e cinco parlamentarionan a huramenta of a haci promesa dilanti Gobernador Alfonso Boekhoudt pa asumi nan rol como parlamentario di Aruba.

Carlos Bermudez, Marlon Sneek y Otami Thomasia di fraccion AVP, y Muzaninn Wever y Ruthlyn Lindor di fraccion Futuro ta e cinco parlamentarionan cu a huramenta. Un di seis parlamentario, esta John Hart no a huramenta ayera tardi, pero lo haci esaki awe mainta net prome cu huramentacion di Gabinete AVP-Futuro.

Na salida despues di e huramentacion e parlamentarionan duna nan declaracion na miedonan di comunicacion local presenta y a expresa nan sentimentonan, pero tambe nan expectativa pa e rol nobo cu nan ta bay asumi.

Marlon Sneek di AVP a indica cu e ta contento di por huramenta un biaha mas pa drenta Parlamento di Aruba y cu e ta cla pa e reto nobo. “Nos a pone nos mes disponibel riba un lista pa sirbi pueblo kiermen esaki ta loke ta sigui despues di dje,” el a expresa.

Di otro banda Carlos Bermudez (AVP) a expresa cu e sentimento ta dificil pa splica, pero ta uno di alegria hopi grandi p’e.

El a splica cu di tempo cu el a sali for di Aruba y a bay studia na Hulanda, semper su meta tabata pa bin back Aruba y yuda den economia di e pais. “E ultimo añanan mi a purba di haci’e den departamentonan di gobierno, pero awor a yega e momento cu via parlamento nos ta bay trece e cambionan pasobra nos ta mira cu e pueblo ta anhela un cambio y e pueblo, no solamente ta anhela, pero e pueblo merece e cambio,” el a bisa.

El a sigura cu e ta cla pa representa e pueblo, sin distincion di color. “Nos no ta papia di diferencia di color, Aruba ta un pueblo tin. Nos ta bay traha pa tur, sea ta berde, geel, biña, cora, un y tur lo bay mira e diferencia entre gobernacion cu ta bay cuminsa cu e siete aña y mey cu ta tras di lomba,” el a remarca.

Otami Thomasia di fraccion AVP a expresa su alegria pa e oportunidad cu nan tin aworaki pa sinta y tuma decisionnan importante pa e pais. “Awor e momento a yega cu tur hende tin nan luga y asina nos ta bay cuminsa traha pa Aruba,” el indica.

Pa loke ta areanan of puntonan cu ta importante of cerca di su curason el a indica cu tin tres area cu ta hopi cerca di su curason y cu e ta haya ta bay hunto, cual ta e area di deporte, area social y enseñansa. “Nan ta tres departamento hopi pisa y cu hendenan ta papia cu mester y nan kier wak cambio den dje,” el a agrega.

Di su banda Ruthlyn Lindor di fraccion Futuro a expresa cu e sentimentonan tabata abrumador y cu emocion di solamente pensa unda el a cuminsa y unda el a yega aworaki. “Cu hopi amor y mi ta honra cu mi ta bay representa e pueblo di Aruba aworaki.”

Mirando cu e trabou ta cuminsa di biaha, el a sigura cu e ta prepara y for di basta tempo a bin ta keda actualisa riba tur e situacionnan politico di e pais.

Muzaninn Wever (Futuro) a splica cu e tin un afinidad, entre otro, pa comercio y tambe kier trece cierto punto riba mesa, manera costo di bida, pasobra esey ta un di e dolornan mas grandi cu pueblo ta pasando den dje.

El a indica cu mester traha pa alivia pueblo su frustracion cu gobierno den sentido cu tur cos ta tarda y con pa mehora proceso dentro di gobierno pa facilita cu tur hende por haya nan derechonan. El a indica cu por ehemplo tardansa di procesonan, of tardansa pa entrega of ricibi cartanan ta cosnan cu ta trece frustracion y cu tambe mester atencion.

“Mi ta kere unabes bo soluciona cierto cosnan asina ki bo por echt dedica tambe na procesa e otro dolor cu ta e cartera di e pueblo y mi ta kere eynan nos tin cu bay concentra riba dje,” el a remarca.