E discurso di nos Gobernador na ocasion di e instalacion y huramento di e gabinete nobo diabierna pasa, no a haya e atencion den prensa cu e merece. Por ta cu e parti di prensa cu tabata apoya e gabinete anterior, di mes no ta asina encanta cu loke e Gobernador a trece dilanti, pero esey no ta kita nada di e mensahe cu e tabata desea di duna na e ekipo nobo, y na esun cu a bay.

Gobernador a trece dilanti algun punto di importancia, segun su vision. E prome tabatin como titulo ‘Oportunidad pa Aruba’. Den esaki, gobernador a trece dilanti cu Aruba a caba di sali di un periodo largo di gobierno di un solo partido, caminda “The winner takes it all” (cita for di e discurso). E electorado a indica awor un caminda diferente, cu un gobierno di coalicion, cu e obhetivo di sirbi pueblo di Aruba. Esaki ta practicamente un critica inusual riba e partidonan cu a goberna nan so den ultimo añanan, cu tabata mas orienta riba sirbi nan mes hendenan. E ta expresa e deseo cu e gobierno di coalicion lo tene mas cuenta cu interes general. El a referi tambe na e titulo di e acuerdo di gobernacion ‘Hunto pa Aruba” cu ta expresa e deseo y vision pa traha pa Aruba den su totalidad.

Gobernador a toca tambe e tema di cooperacion den Reino. El a recorda cu e relacionnan den Reino den ultimo añanan tabata bao di hopi presion, loke ta rekeri un actitud positivo, pa por contribui na un mehoracion di e ambiente den Reino, creando e confiansa necesario. Y esey lo por logra buscando e puntonan comun fuerte, y no e diferencia o debilidadnan.

Gobernador den su discurso a desea di referi tambe na e papel cu e gobernador, en general, tin di hunga den gobernacion. Esaki e ta haya importante, pasobra manera bisa textualmente, “Den e ultimo 10 lunanan (desde mi nombramento como Gobernador di Aruba), mi a experencia hopi inconsistencia den expectativanan di kico ta rol di Gobernador. Expectativanan cu no semper tabata basa riba nos constitucion y e posicion di e Gobernador.” El a continua: ”Fuera di e rol aki, mi ta representa Gobierno di Reino den asuntonan cu ta regarda Reino Hulandes manera stipula den Statuut. Si mi persona den cierto casonan mester haci uzo explicito di tareanan y responsabilidad di mi investidura Real, esaki ta wordo defini door di boso mes! Si boso riba diferente tereno di maneho tin tur cos na ordo, Reino no tin motibo pa involucra su mes relaciona cu interes di Reino of su funcion di garantisa bon Gobernacion.”

Sin duda algun e expresionnan di Gobernador ta referi na e ambiente menos positivo cu tabata reina entre su persona y e gobierno anterior, cu no a laga ningun ocasion bay perdi pa mustra nan desaprobacion di e nombramento di su persona como Gobernador, contrario na e aceptacion amplio cu su persona a haya di banda di pueblo mes. Tambe por mira esaki como un critica riba e afan indesea di cierto politico di semper busca y hasta sobrepasa e margennan legal di Constitucion y Statuut, na luga di actua den espirito di esakinan. Tambe ta remarcabel cu e Gobernador a pone enfasis riba su derecho di ser informa, di duna conseho y di adverti. Den su mes palabranan: “The right to watch, the right to warn, and the right to advise.” Un advertencia serio cu cualkier gobierno mester sa di respeta e aspectonan aki di su funcion? Nos nunca a haya di tende si e prome ministro anterior tabata respeta e reunion periodico cu e mester tabatin cu Gobernador… Asina e ta parce; un advertencia di ‘no haci loke esunnan prome cu boso a haci.’

Kico nos como ciudadano por saca di tur esaki? Cu Gobernador tin intencion di cera un capitulo menos agradabel di relacion entre e gabinete di e momento ey y su persona, of miho bisa, e posicion di Gobernador. Pero no sin advertencia pa no cay den ripiticion. Y den esey ta importante pa tuma algun asunto na curason. Den Reino Hulandes no tur cos ta graba den ley, y mucho menos den piedra. E trato pa cu e Rey, y su representante na Aruba, ta rondona di cos cu ta haci, y cos cu no ta haci, sin cu e persona en cuestion mester bin cu e pregunta di semper: “Unda e ta para; unda e ta skirbi?”

Nos por a mira esaki den e trato cu Gobernador a haya di e ministro presidente anterior, nos por a mira esaki tambe den e maniobranan pa hustifica mantene un ministro den funcion, sin cartera y sin tarea, alegando concordancia cu nos constitucion, mientras cu den e tradicion di Reino e unico contesta aceptabel tabata e retiro riba su propio iniciativa di e ministro concerni. Mester corda cu un ministro na Aruba no ta ministro di Gobernador, sino un ministro di Rey y por lo tanto mester mantene respet pa e normanan di Reino, y no esunnan di cas di partido. Nos ta spera cu e palabranan fuerte y acerta di Gobernador, a habri un epoca mas positivo.