Riba diaranson dia 2 di december 2020, Gobernador di Aruba, Su Excelencia Alfonso Boekhoudt, a haci un bishita di trabou na e COVID-19 testcenter na Aeropuerto Internacional Reina Beatrix. Sra. Olga Rodriguez (Cluster Manager Asistencia Medico y Policlinica, HOH) y Sr. Jurgen Benschop (Director di Operacion, AAA NV) a ricibi Gobernador Boekhoudt.
Meta di e bishita tabata pa Gobernador haya un impresion di e actividadnan na e testcenter di aeropuerto y e cooperacion entre AAA, DVG, y HOH. Den e cuadro aki, Sr.Jurgen Benschop, Sr.Michael van de Poel (Hefe di Ekipo, DVG) y sra. Shahaira Geerman (Gerente di Cuido, HOH) a duna un presentacion cortico tocante e trabounan diario na e testcenter di aeropuerto y e colaboracion entre tres instancia.
Despues di un bishita bou guia den aeropuerto, Gobernador por a tira un bista na e testcenter den e sala di yegada. Siguidamente Gobernador Boekhoudt a papia un rato cortico den VIP-room cu Sr. Joost Meijs (Director, AAA), Sr. Jacob Vroegop (Voorzitter RvB, HOH), Sr. Edwin Kelly (Director di Aviacion y Sr. Jerry Staring (Director, DVG).
