Gobernador a firma e retiro di Marisol Lopez Tromp; Argumento nobo ta e falta di homogenidad den Conseho di Minister

Prome Minister Evelyn Wever Croes ademas di su cartera di Minister pa Asuntonan General, Administracion Publico, Integridad y Energia, awor ta Minister di Ordenanza Teritorial, Infrastructura y Medio Ambiente.

Esaki ta locual Su Excelencia Gobernador Alfonso Boekhoudt a informa Presidente di Parlamento den un carta. Ta den e carta aki tambe e ta pidi pa Parlamento duna su conseho de inmediato pa asina efectua e retiro di drs. Marisol Lopez Tromp como e titular encarga cu e carteranan cu awor ta resorta bou Prome Minister.

Segun e carta di Gobernador, Prome Minister Wever Croes a manda e concept di ley unda ta retira drs. Lopez Tromp como Minister Desaroyo Teritorial, Infrastructura y Medio Ambiente, despues di apenas 9 luna den funcion.

Conseho di Minister a aproba e retiro durante su reunion di dia 21 di October 2020. E argumento ta cu funcionamento di Gobierno ta den wega si no por garantisa homogenidad di maneho di Gobierno. E ta di balor, tanto pa e Minister individual, como pa e totalidad di Ministernan, cu nan ta riba un liña y cu nan ta carga e liña aki pafo di Conseho di Minister tambe.

Alabes, Prome Minister a presenta un concepto di ley unda su persona ta keda encarga cu e cartera cu te cu ayera tabata un responsabilidad di Lopez Tromp.

Gobernador a bisa den su carta cu e ta dicidi pa retira Marisol Lopez Tromp como Minister. Y teniendo cuenta cu articulo II, 2, inciso 1 di Constitucion, su Excelencia Gobernador ta pidi Parlamento pa su opinion.

Gobernador di Aruba a ricibi concepto di decreto nacional

Segun un comunicado di gabinete di Gobernador, e concepto di e decreto tabata trata retiro di minister di Desaroyo Teritorial, Infrastructura y Medio Ambiente, señora Lopez-Tromp. Conseho di minister a aproba e retiro dia 21 di october 2020.

Gobernador di Aruba a dirigi un carta ayera merdia na Presidente di Parlamento den cual a pidi pa e huicio di Parlamento tocante e intencion pa retira e minister. A pidi e huicio aki a base di articulo II.2, prome paragraf, di Constitucion di Aruba. Den e carta Gobernador ta señala cu funcionamento di gobierno ta na peliger si no por garantisa unidad di e politica gubernamental. Tanto pa e ministernan conhunto como pa cada minister individual ta di importancia pa, en cuanto e politica, nan ta riba e mes un liña y cu nan ta propaga of por propaga e liña ey.