Algun dia pasa Bon Dia Aruba tabatin un entrevista interesante cu hefe di Inmigracion na aeropuerto. Hopi detaye di nan trabao di cuida nos frontera pa loke ta trafico di persona a bin dilanti. Pero e entrevista a lanta cierto pregunta tambe. Por ehemplo, con ta para cu e colaboracion cu e otro instancianan, manera DIMAS, cu ta responsabel pa informacion tocante estadia (legal) di un persona na Aruba. For di e informacion suministra por comprende cu awendia Inmigracion no tin informacion continuo tocante e status di un persona cu a drenta como turista y cu a pidi un prolongacion di su estadia na DIMAS y a haya esaki of no. Ta ora e persona presenta pa sali di Aruba nan ta haya sa si el a keda mas tempo cu tabata permiti, ta constata anto cu e ta ilegal pero a punto di bandona Aruba en todo caso… Fantastico, tremendo constatacion, cu por haci impacto riba esnan cu no ta informa tocante e sistema digitalisa di mas di binti aña pasa. E tempo aya tabata existi un sistema digital integra cu tabata contene tur informacion di Inmigracion y di DOOV (antecesor di DIMAS).
Pregunta: ken, ki dia, a bin riba e tremendo idea pa separa e basenan di dato di e dos servicionan aki? A tuma e decision aki deliberadamente pa obstaculisa e posibilidad pa detecta esnan ilegal den un fase tempran caba? Of nos mester supone cu ignorancia y falta di profesionalismo a hiba hende cu salario halto na manca sistema di informacion cu tabata funciona masha bon y no tabatin mester di cambio cu a significa de facto un calidad di informacion deteriora? Cu a hiba na e situacion actual cu e hefe di Inmigracion ta señala cu nan no sa automaticamente si un persona eventualmente a haya un extension di su estadia.
Pero esey no ta tur. A pesar di e falta di e informacion di DIMAS, nada ta stroba Inmigracion pa traha lista periodicamente di e personanan cu a keda atras despues cu nan periodo di estadia turistico vence. Informacion digital ta algo cu por genera varios biaha pa dia si ta necesario, pero den e caso aki ta suficiente pa traha un ‘query’ cada siman, por ehemplo. Igualmente por pidi colaboracion di DIMAS pa duna un update di esnan cu a haya extension di nan estadia turistico tur siman. Esaki naturalmente te dia cu reestablece e integracion di e basenan di dato cu den pasado tabata forma un solo sistema.
Un pregunta cu a keda colga den aire ta pakico a bin cu e separacion di e informacion digitalisa. Nos no ta 100% sigur, pero por ta cu na dado momento a separa DIMAS for di ministerio di husticia y a pone bao di otro, como medida temporal palabra cu Hulanda. Despues, den cambio di gobierno no tabatin realmente un motibo valido pa laga DIMAS bao di ministerio di Infrastructura, pero tal bes pa motibo puramente di wega di ‘grabbelton’ den formacion di gabinete, unda deseo individual y peso den partido di ministronan ta mas decisivo pa formacion di ministerionan cu sentido comun y escogencia a base di cartera cu ta pas cu otro. Por cierto cu recientemente a yega na un acuerdo entre e ministronan di husticia di Reino, cu DIMAS mester bay bao di ministerio di husticia, unda e ta pertenece. Pero parce cu aki tambe e mandatario di husticia ta dispuesto di bringa cu tur hende menos cu su coleganan. Lo ta interesante pa sa si el a haya contesta caba di su Prome Ministro…
Banda di esaki nos tin e problema sin solucion ainda di e otro servicionan gubernamental cu mester di informacion clave di DIMAS. Algun tempo pasa nos por a tuma nota di un colaboracion nobo entre DIMAS y Banco di Seguro Social (SVb), pa e ultimo aki haya informacion tocante miles di persona stranhero cu a haya permiso pero pa cual e dunado di trabao no ta aportando nada di e primanan cu mester paga. Naturalmente e mesun problema ta toca tambe Servicio di Impuesto y AZV cu tampoco ta haya loke nan mester haya. Tur esaki ta haci un pregunta grandi bin dilanti: gobierno ta wardando pa algun sabio di exterior bin conta nan cu nan mester integra cierto fluho di informacion digital den gobernacion, pa por mehora prestacion di diferente servicio y alabes mehora e cumplimento di sector priva cu nos leynan?
Of nos mester supone cu ta deliberadamente ta mantene e separacion di informacion aki, cu den pasado no tabata existi? Ki interes politico o economico ta sirbiendo aki, nengando di intercambia informacion sistematicamente tocante persona y empresa? Den e mundo moderno cu nos ta biba aden na 2016 tin un tesoro di posibilidad pa facilita informacion digitalisa entre entidad gubernamental, conservando semper e parti confidencial cu no ta asunto di e otro departamentonan. Pero ki dia nos a tende un mandatario papia tocante e aspectonan aki di gobernacion drechi? Nunca, mientras cu mas di binti aña pasa empleado publico serio tabata elabora plan caba pa atende e asunto aki.
