E coalicion na Boneiro no tin un mayoria mas den e Eilandsraad. Esaki ta nifica cu probablemente e gobernacion (Bestuurscollege) lo entrega su retiro na gezaghebber Edison Rijna.
Esaki Ret Karibense, nos partner den noticia, a publica. Jeanoushka ‘Nunu’ Raphaela a retira su sosten na e coalicion.
Menos cu un mey aña a pasa di instalacion di e gobernacion aki consisti di MPB y e miembronan independiente Esther Bernabela y Raphaela. Sra. Bernabela a kibra cu UPB na mei y asina e coalicion e tempo ey yama coalicion di patia hunto cu PDB a cay. Y na februari sra. Raphaela a retira for di e partido UPB, un poco despues cu el a huramenta como miembro di e Eilandsraad.
Motibo
E motibo cu Raphaela awor a duna ta cu e lider di MPB no a cumpli cu su promesanan di mehora e bida di esunnan cu menos recurso na Boneiro. Como ehempel e ta menciona e sueldo minimo cu ainda ta bou di e suma minimo cu mester pa biba, y tambe e onderstand cu pensioen ta asina poco segun e cu hende no por biba di dje. Tambe e ta bisa cu e kinderbijslag ta solamente 40 dollar.
Sra. Raphaela ta haya cu e gobernacion di Boneiro mester actua diferente contra Hulanda tambe. E ta haya cu ministerio di Asuntonan Interior y di Reino ta haci cu Boneiro locual nan kier y e gobernacion local mes no ta protesta.
