Goberna ta keda…Mira bo dilanti…

Cu gobierno nobo instala y un presupuesto 2025 aproba, nos por mira awor e gabinete nobo cuminza haci tur loke tin den un documento considerable cu ta presenta e plannan pa e periodo di gobernacion. Sina mes no ta trata di tur detaye, eseynan lo bin despues ora e ministerionan cuminza presenta nan plannan concreto. Sin embargo, na nivel general tin algun asunto cu ta yama nos atencion.Ademas, mester tene cuenta cu e panorama eonomico internacional, unda tin algun nubia grandi na caminda cu por distorsiona cualkier plan actual; mas di esey djis aki.

En todo caso, trabao gubernamental ta encera tambe pronto e promer bishita oficial, di e Secretario di Estado responsable pa Asunto di Reino. Probablemente esaki no ta bira un simple bishita di cortesia; riba mesa lo tin e ultimo decisionnan pa tuma encuanto e ley di Reino di supervision financiero. Tin problema? No necesariamente, si nos lesa e programa di gobernacion bon, ta acepta como gobierno en principio e ley.

E texto ta duna e impresion si cu e gabinete tin ainda deseo pa presenta. Nan no ta nobo: yega na un acuerdo pa un ‘exit-clause’ pa terminacion di e ley, un interes mas faborable posible pa e debenan pendiente di Aruba, crea un fondo di inversion pa Aruba y yega na acuerdo cu Hulanda pa pasa e debe pa e fondo menciona. Den otro capitulo por lesa tambe cu ta e intencion pa logra cu Hulanda ta refinancia, na interes faborable, e otro debenan externo y tambe e debenan den cuadro di e proyectonan ‘PPP’. E ultimo aki ta parce nos un poco prematuro y optimista. E proyectonan PPP tin como base un convenio cu un empresa cu ta ‘diseña, construi, mantene y financia’ henter e proyecto. E ta un convenio di por lo menos 20 aña y cambia di ‘prestamista’ ta significa elimina un convenio cu un partner cu probablemente lo no gusta esey; hasta lo tin clausula specifico pa un tal situacion den e convenio. E demas debenan di Pais Aruba, cu Hulanda por financia, ta aparece solamente ora nan madura y mester renoba e financiamento o pasa esaki pa otro entidad; no ta kibra contrato pa cera uno cu Hulanda. Importante tambe ta cu a pone un paro na mas proyecto PPP, ya cu esakinan hunto tabata yega na un peso di pago pa gobierno di mas di 2% di GDP. Nos ta spera cu no ta e intencion di baha carga di interes pa por crea espacio pa entama mas proyecto PPP den futuro. Por lo tanto nos duda con ta bay logra esaki, igualmente e propuesta pa pasa e debe pa e fondo di inversion, cu ta igual na un donacion.

Di otro banda, e bon cooperacion cu e gabinete nobo ta desea di logra cu Hulanda, Reino y Union Europeo ta duna di supone cu un promer requisito ta un acuerdo solido pa e ley di Reino di supervision, cu ademas mester por conta cu apoyo mayoritario di Staten. Pa nos haya e confirmacion ey no lo dura tanto, pasobra gobierno Hulandes, a traves di su secretario di estado, a laga sa caba di no ta interesa den pospone e fecha di 1 di mei, por lo tanto pa e fecha ey lo mester tin tratamento den parlamento di e proyecto di ley y un resultado, positivo o negativo. Nos ta kere positivo, pasobra sino, por wel di warda tur e bon intencionnan presenta den e plan di gobierno riba tereno di cooperacion cu Hulanda y Reino.Nos no ta bisa esaki pa ta negativo; tin en berdad hopi ‘at stake’, cos cu por logra den e cooperacion menciona. Entre otro e plannan pa rehabilitacion di e centronan urbano di San Nicolas y Playa, ta requeri planificacion y inversion costoso, cu lo ta dificil pa realiza completamente cu experticio y capital gubernamental. E caminda pa explora y yega, talvez, na apoyo financiero di Union Europeo ta largo y dificil y no ta recomendable pa pone individuo politico, cu merece nan recompensa pa a campaña exitosamente, den e trayectonan aki.

Surplus, cual surplus?

Finalmente, nos tin nos reserva encuanto cierto comentario cu nos ta capta tocante e normanan di presupuesto. Ta bisa cu por suaviza e normanan, pa uso di e surplus, pasobra por constata cu loke ta drenta den caha di gobierno ta hopi mas cu a anticipa. Esey ta berdad, pero a mira tambe loke nos tin nos dilanti? Hopi di nos ta sigui noticia internacional tur dia y sa masha bon cu e rumbo di economia mundial ta cambiando rapido y practicamente a base diario, y no pa mihor. Nos principal mercadonan turistico ta den curazon di e bataya politico y economico aki, Estadonan Uni y Canada, cu e perspectiva cu por lo menos parti di nos pronostico economico pa e aña aki mes no ta keda realiza. Y si cos bay malo, otro aña por ta igual. Kico ta e consecuencia? Pa gobierno, cu e famoso surplus por evaporea mas liher cu plas di awa ora solo sali atrobe. Anto despues nos ta bay pidi Hulanda yuda nos atrobe, sin spera cu nan ta puntra: “Aha, y kico boso ta trece, boso tabatin un surplus basta bon aña pasa…? “Si, pero esey a bay caba, na…, whatever”. Nos ta desea pa hende tuma nos pais na serio, si ni siquiera ta referi na e tema cu henter mundo ta mira grandi nan dilanti? Si turismo cay cu 10% so, ya caba e ‘surplus’ a desaparece. Nos niun ta desea esey, pero…