Goberna na distancia… Ta yuda o ta daña…?

Den e dianan aki nos ta mirando diferente ehemplo con gobernacion, di cerca o mas na distancia, tur ta termina den problema y duda di e calidad di administracion y maneho.

E ehemplo cu a bin dilanti ayera ainda ta e problemanan continuo na Hospital, cu de vez en cuando ta resulta den expresion di malcontento di e personal. Despues cu nan caba di tuma solo nan por bay paden atrobe… y bida di e instituto ta sigui su curso normal. Aki algun tempo nan ta para pafo atrobe, nan CAO no ta regla ainda, e boiler cu ta ocasiona e holor fuerte di diesel ta na mesun lugar, seccion di radiologia talvez ta trahando atrobe… enfin, e lista conoci di fayo y deficiencia cu no ta termina. Loke ta causa mas iritacion den comunidad ta cu e diferente actornan ta hinca den e wega interminable di acusa otro, mientras nan mes ta inocente; e conocido formula di “ikke niet, maar hij ook.”

Contemplando tur e confusion aki, unda no ta facil pa descubri ken ta responsable pakico, nos ta puntra nos mes si tur esaki no ta mustra riba un problema mas general, algo mas grandi cu hospital, mas grandi cu e diferente fundacionnan cu a institui pa, supuestamente, haci bida gubernamental mas facil. Pero, esaki di berdad ta e caso?

Loke segun nos opinion ta bira visible aki ta e fenomeno di trata di goberna y administra na un manera diferente, unda gobierno ta mantene su mes na cierto distancia y ta laga administracion y maneho di cierto tarea (semi)gubernamental na otro entidad. Tur esaki a base di e filosofia (internacional) di gobernacion na mas distancia, supuestamente pa minimalisa e influencia politico riba e tipo di administracion aki: goberna ‘at arm’s length.’ Ta supone cu di e manera aki por garantisa un maneho mas profesional, mas basa riba criterio tecnico, cu finalmente mester duna un miho resultado cu simplemente maneha e tareanan aki directamente bao capa di un ministerio. Awor, bon, esey ta e teoria, pero ban dedica atencion na e practica. Un analisis di algun caso, manera Hospital, o Serlimar, ta duna nos rapidamente e impresion cu e realidad ta leu di e modelo ideal di e tarea gubernamental poni na distancia ‘pa su mes bon’. Kico ta e deficiencianan cu ta haci cu aparentemente no ta logra yega na un nivel aceptable di gerencia y administracion?

Prome cu tur cos ta importante pa mira si berdaderamente e institucionnan aki ta percura pa nan tin gerencia y administracion na un nivel superior, en todo caso superior cu si nan a keda bao di e capa di gobernacion. Hospital ta un caso un poco diferente pasobra e ta bin di un pasado di cuido medico cu no tabata den man di gobierno, y a lo largo a bin haya un forma di colaboracion den forma di algun fundacion cu ta estrechamente liga, cu directiva practicamente identico. Pregunta cu ta surgi ta, si den e forma di organisacion aki por exclui e influencia di e gobierno di turno. Nos tin e impresion cu no, pero e constatacion ey no necesariamente ta negativo. Unda fondonan considerable di comunidad ta bay dirigi na e gastonan di cuido medico, ta logico cu tin cierto influencia di gobierno. Loke ta mas importante pa analisa si ta haci bon uso di e influencia inevitable aki, o cu ta mas bien añadi na e problemanan di organisacion cu tin caba. Aki ta aparece e fenomeno di e ‘persona di confiansa’ di e mandatario di turno, cu no mester di ningun cualificacion tecnico o profesional. Por ta cu ta p’esey e tipo di organismo aki generalmente no tin exigencia profesional pa e puestonan den directiva, pa no stroba entrada di ‘hende di confiansa’ cu no tin mucho mas cualificacion cu e ‘confiansa’ ey?

E sucedidonan reciente na Hospital ta mustra riba otro problema tambe. Por ehemplo: e fundacion SOGA ta realmente ekipa pa acompaña e tipo di proyecto di renobacion/expansion manera esun na Hospital? Cu varios propiedad riba nan nomber, lo no ta logico cu tin un staff tecnico mas amplio cu loke tin awor aki? Tambe nos ta haya straño, cu den e cooperacion profesional entre AIB y SOGA, nos ta bin ripara cu un persona cu ta den gerencia di AIB, ta tambe den e directiva di SOGA. Lo no ta normal cu seguramente aki ta mantene ‘distancia’ tambe, pa evita cu un persona, y su dunador di trabao, ta haya nan den conflicto di interes? Ta asina dificil pa evita e tipo di peligro aki? Pakico esun cu ta representa e ‘boekhouder externo’ tin tambe ‘voz y voto’ den directiva di SOGA? No ta esaki ta yega cerca na loke Hulandesnan ta yama ‘de slager die zijn eigen vlees keurt’?

No pa prome biaha nos ta señala e necesidad pa gobierno tira un vista firme y fuerte riba henter e aglomeracion di fundacion y otro entidad cu a crea pa garantisa un miho maneho, na beneficio di comunidad en general. Nos ta mira hopi señal cu ta trece duda si realmente ta esey ta e meta cu nos ta logrando. O nos mester conclui cu tur e organismonan aki ta pa amplia e posiblidadnan pa recompensa ‘persona di confiansa’?