Nos tin un aña nobo nos dilanti, yen di reto, pero yen sigur tambe di tur tipo di bon intencion. Esey na nivel personal di talbes no cada un di nos, pero en todo caso hopi si. Na nivel general di nos pais esey tambe ta asina. Nos ta cuminsa aña cu varios cambio cu supuestamente mester hiba nos dilanti, y cu di tur manera ta provoca basta comentario. Un di nan ta e regreso na e sistema tanto critica den pasado di plachi di number cu mester cambia anualmente. Algo cu den otro pais pa hopi aña no ta e practica mas, si acaso nan tabatin e mesun sistema cu nos a adopta atrobe. Laga nos cuminsa full na inicio di e asunto aki atrobe.

Pa cuminsa, no ta di e temponan aki mas, pa kier controla si impuesto riba vehiculo ta paga di e manera aki, via number. Unabes bo tin un sistema digitalisa di registracion di auto, ta facil pa ekipa autoridadnan cu un sistema, unda na cualkier luga nan por controla e status di e auto ey, si su wegenbelasting ta paga, si e tin un keuringskaart valido, si su seguro ta paga. E sistema basico t’ey caba, pasobra polis, si nos no ta hera, tin acceso na e datonan di un cierto vehiculo, manera ken ta e propietario y unda e ta biba. No mester ta asina dificil anto pa acopla e otro datonan pa nan tin tur cos na nan disposicion. Pero mientras esey ta posibel, nos ta ripara cu di banda di Servicio di Impuesto ta bin cierto desaroyo di control, cu aunke como ciudadano nos no gusta, pero e ta efectivo si. Cuanto di nos no tin un auto bieu, cu talbes net ainda no ta un clasico, y nos kier mantene e number, pero como cu e no ta prioridad, bo no a paga e belasting pa e aña of parti di e aña, ainda. Bo ta haya un bunita notificacion na cas cu bo ta violando ley y cu pronto ta spera bo paga, number y multa. Rabia no ta yuda y simplemente mester tuma un decision si bo ta sigui haci uso di e number of no, y actua segun bo decision. Nos por considera e diligencia di e departamento un mehoracion? Sigur, y esey a pesar cu como individuo cu mester paga un multa, nos no ta encanta, pero por comprende cu e ta un medida cu tin intencion di trece orden.

Sinembargo, e mehoracion di e sistema di control aki ta trece cune tambe, cu nos mester puntra nos mes si ta necesario ainda pa polis por mira di biaha si un belasting ta paga, via e plachi di number. Pasobra esey ta e motibo pa re-introduci e plachi di number cu ta cambia tur aña, cu diferente color. Si e sistema di Belastingdienst ta traha asina bon, cu nos ta percura bunita asina cu nos tin nos number paga, kico polis ta controla ainda? Claro cu den un control general, of despues di un accidente, polis ta controla tur cos, tambe si e number ta paga. Si esey no ta e caso, bo ta haya un multa, loke ta pasa tambe si bo seguro no ta paga… Loke ta trece nos riba un pregunta interesante: pakico no ta importante pa polis por wak di biaha si bo tin bo seguro di vehiculo paga? Ta ora nan para bo y ta controla tur cos, e ora nan ta bin haya sa cu bo ta core sin seguro, toch? Nan a exigi un sticker of algun otro señal pa nan sa cu ‘esun ey’ ta core sin seguro? No, ta ora para bo pa controla y bin comproba cu bo no tin seguro, ta tuma accion.

E ora anto, atrobe e pregunta, ta pakico nos mester plachi di number cu ta cambia tur aña, si pa motibo di e control organisa di otro forma, esey no ta tanto relevante mas?

Si nos, na luga di bay den pasado atrobe, a aboli e sticker tambe y duna tur auto un number permanente, cu ta keda cu e auto te dia cu e no ta existi mas, es decir, ta caba tambe cu e cuenta di pone mesun number riba diferente vehiculo, nos ta haya plachi nobo solamente ora esun actual bira mahos of ilegible, of bay perdi. E ora, contra entrega di e plachinan bieu bo ta haya nobo, cla. Di biaha nos a ‘get rid’ di henter e problema ambiental di miles di plachi di aluminio cu ta keda ‘somewhere’. Aki tambe nos por haci un contribucion na ‘desaroyo sostenibel’ limitando e desperdicio di recurso natural costoso, manera ta e caso di tur metal.

E problema di e storia aki ta, cu en bes nos bay dilanti, nos ta bay den pasado, y pa ki motibo? Pa satisface algun di nos cu ta haya esey asina importante, sin cu nos ta scucha sikiera un argumento bon? Pasobra faborece un empresario cu tin e tarea pa importa e material, pa nos no ta suficiente motibo pa mantene ainda y atrobe cada aña henter e pantomima di para den rij warda pa haya plachi. Parce cu nos no ta siña.