Goberna a base di no tuma decision…?

Na Hulandes nan sa bisa: “Geen beleid is ook beleid.” Keda sin maneha, sin duna claridad kico ta kico y pa unda nos ta bay, tambe ta maneho…, anto malo. Esaki ta e sentimento y impresion cu nos ta haya ora nos ta sigui e acontecimentonan na departamento di Salubridad Publico, despues cu hues a ordena e regreso inmediato di e director na su puesto. Nos por a comprende di palabranan di e ministro concerni, cu e no tabata di acuerdo, pero esey nos tabata sa caba, ta pesey a bay hues tanto biaha.

E problema cu a surgi, y na cual e sindicato Topa ta referi den nan reaccion publico pa cu esaki, ta cu e director a bolbe, a reanuda su responsabilidadnan, sin cu tabatin accion di e nivel ministerial, al menos no cu nos ta na altura, pa defini bon cla pa e empleadonan, y tambe pa publico en general, ken ta dirigi e departamento y ken no. Asina aki esaki ta bira un caso ehemplar di ‘maneha sin maneho’.

Lo no tabata mas logico si despues di e veredicto di hues e mandatario concerni a declara publicamente, y manda un carta oficial pa e departamento, y resto di gobernacion, pa anuncia e regreso di e director na su puesto, cu e argumento cu, aunke e ta mira e asunto di otro manera, ta pesey tabatin un disputa te den corte, e ta honra decision di hues, pasobra esey ta loke den un pais cu ta respeta su mes un mandatario ta haci. Cu e mandatario en cuestion na mas cu un oportunidad ta bira emocional, esey riba su mes no ta un problema, basta e sa si cual ta e momentonan unda razon mester prevalece riba emocion. Nos no tin e impresion cu semper e escogencia corecto ta sobresali.

Tur esaki naturalmente banda di e hecho cu, manera a bisa na nomber di e ministro den corte, cu e tin un rapport di evaluacion di e director den su man, riba cual e lo actua proximamente. E mandatario tin e prerogativo completo pa marca e proximo pasonan cu e ta considera corecto. Segun a keda anuncia caba den e caso, su decision lo ta cu e ta bay retira e director di e puesto, pero lo mester mas tempo pa yega na un decision unda pa manda e persona concerni. Si esey lo ta e caso, anto nos por spera mas caso den corte, anticipando cu e director lo entama apelacion contra tal decision.

Nos no conoce contenido di e rapport, asina ta cu nos no ta bay specula tampoco; na su debido tempo nos lo tuma nota di esey. Sin embargo, den e caso actual esey no ta relevante; hasta si laga e director sinta den su stoel atrobe pa cinco minuut, gobernacion mester duna e bon ehemplo pa loke ta respeta decision di hues. E aspecto mahos di e asunto ta cu no ta tuma accion apropia na nivel ministerial, pero ta laga e asunto na e sindicato concerni, cu ta hibando palabra como si fuera nan ta opera e lugar. Hasta ta dirigi palabra na esnan cu ta opta pa sigui instruccion di e director den e situacion di ‘vacuum’ cu e ministro ta laga, a proposito? Nos ta spera cu no.

Sin embargo, tabatin mas aspecto cu a hala nos atencion den e caso aki. Manera por ehemplo e acusacion den pleno publico di e sindicalista cu a hiba palabra pa e sindicato Topa siman pasa, unda a acusa e director di DVG cu tanto palabra di a usa e titulo di doctorandus sin cu e tin un diploma den e categoria ey. Confronta cu prensa cu a puntra, corectamente, tocante e prueba, el a referi na ministro y su hendenan cu supuestamente lo mester a haci e debido investigacion. Pa bisa berdad, nos a keda cu un par di pregunta. Uno ta si e acusacion ta berdad of no. Si e acusacion no ta berdad, nos ta supone cu e director conoce e caminda hudicial cu e mester cana, si e ta desea esey. Di otro banda, si e acusacion ta corecto, lo ta interesante pa sa si e autoridadnan concerni, atrobe e mesun mandatario, ta bay actua cuminsando e ruta hudicial apropia pa esaki. Loke no por, ta cu ta laga e cosnan aki colga den aire, sin cu ta haci niun y ningun.

Por ultimo, e asunto di e ‘doorlichting’ di e departamento cu a dura 11 luna. Si ta esaki ta e nivel riba cual e departamento di Recurso Humano ta opera, anto nos no ta kere cu tin hopi cos ta bay mehora den e aparato gubernamental. Ta di spera cu en berdad, manera a ser bisa den un di e prome comunicacionnan cu e mandatario, cu e analisis lo ta un ‘doorlichting’ completo di e departamento, cu por sirbi pa reorganisa e departamento aki di tal forma, cu e por fungi como ehemplo pa e siguiente departamentonan unda reorganisacion ta necesario, cual ta practicamente tur. Sin embargo, aki tambe no tin un maneho cla, den ki direccion nos ta bayendo. Mientras tanto, como 50% di presupuesto gubernamental ta bay na gasto di payroll. Y…, maneho?