Go Cultura Foundation ta un fundacion crea na 2017 pa duna un protagonismo mas grandi na industrianan cultural y creativo na Aruba. E aña aki nan ta invita esnan interesa den area aki pa participa den un sesion informativo pa mañan diasabra.
E invitacion aki ta dirigi na tur artista, creativo, empresario cultural, empresario creativo y tur cu ta forma parti di Aruba su industrianan cultural y creativo. Den esaki, Go Cultura Foundation ta continua cu su encuentronan, unda a mustra un interes y entusiasmo hopi halto pa e sesionnan aki.
Durante e encuentronan aki, nan ta presenta algun proyecto specifico di Go Cultura cu ta andando y tambe nan ta propone na esnan presente pa fortifica y empodera otronan mas a traves di algun iniciativa concreto. Asina ey nan ta activa y desaroya Aruba su Industrianan Cultural y Creativo (CCIs).
Den esaki, tambe ta bay papia tocante empleonan futuro potencial den industria, training pa entrepreneur creativo cu ta contribui na creacion di mas trabou y innovacion. Industrianan creativo ta motor clave di crecemento economico manera e fundacion ta enfatisa.
Dianan pasa nan tambe a organisa un otro encuentro pa personanan involucra den area aki y asina nan ta sigui purba pensa riba solucion pa varios reto cu nan ta enfrentando, tuma accion concreto pa mehoracion y ta continuamente consciente di e potencial inmenso di e sector.
Ademas, 21 di april ultimo, nan a conmemora e Dia Mundial di Creatividad y Innovacion, pa cual nan a organisa un otro encuentro interactivo cu artista, creativo, educador, empresarionan cultural y creativo di Aruba.
Nan ta considera e encuentronan aki esencial pa varios motibo. Na prome luga, e sesionnan aki ta brinda un plataforma na esnan presente pa comparti nan experiencia, ideanan y desafionan den e industria. E sesionnan di Fundacion Go Cultura ta yuda nos señala y identifica problemanan comun y e necesidad di desaroyo di solucionnan y strategianan pa adresa nan.
Na di dos luga, sesionnan aki ta yuda den crea mas relacionnan y “netwerknan” den e industria. Esaki por conduci na colaboracion y aliansanan cu por ta beneficioso pa artista y creativonan individualmente y pa e industria den su totalidad.
Di tres, e sesionnan aki ta yuda eleva consciencia di e importancia di e industrianan aki (CCIs) pa e comunidad en general.
Finalmente, door di demostra e trabou di artista y creativonan y enfatisa e beneficionan economico y social di e industria, e sesionnan aki ta crea sosten pa e sector y sigur lo yega na stimula inversion y mas fondo pa realisacion di proyecto.
Durante e ultimo dos sesionnan di Fundacion Go Cultura, mescos cu combersacionnan cu varios persona den e sector pa e ultimo 5 añanan, nan ta keda descubri varios reto comun.
Esakinan ta inclui problemanan relaciona cu fondonan, acceso na recursonan y infrastructura, derecho di propiedad intelectual, y e necesidad di reconocemento y sosten for di varios stakeholder.
A pesar di e desafionan aki, nan ta contento di a ripara un entusiasmo y motivacion pa por traha hunto pa mehoracion. Esaki ta pa motibo cu hopi individuo den e industrianan aki ta pasiona tocante nan trabao y ta sigui compronde e impacto y potencial cu e industria tin riba cultura, sociedad y economia.
Pa nan ta importante pa continua cu e encuentronan aki ya cu e ta un oportunidad valioso pa sostene desaroyo y crecemento di e industria. Nan ta sigura cu nan ta comprometi pa crea un ecosistema mas sostenibel y vibrante pa artista y creativonan prospera. Pa cu esaki tambe nan a presenta un proyecto concreto di investigacion pa por finalmente demostra cu data y evidencia e desafionan, balor y tambe potencial di e industrianan aki.
Pero esaki no ta e unico iniciativa cu Go Cultura Foundation ta bin haciendo; nan tambe a organisa diferente concierto pa recauda fondonan pa e fundacion pa por haci un biahe importante pa completa e documentario di dos episodio, esta “E historianan desconoci di Aruba su himno y bandera.”
Na 2021, e fundacion a cuminsa haci diferente trabounan pa por haci un foro y for di eynan a surgi un idea pa crea un encuesta pa haya sa di comunidad kico ta e percepcion di comunidad di Aruba riba e topico aki.
Pa haya si comunidad ta compronde, si ta di acuerdo pa bay desaroya un pilar economico nobo cu ta un di e pilarnan cu departamento economico a señala como un pilar prometedor. Esnan den e sector tambe cu ta tuma e encuesta a haya preguntanan diferente basa riba kico nan ta contesta. “el a duna nos como organisacion e idea di cuanto persona mas o menos ta biba danki na nan habilidad of recursonan creativo”, Edjean Semeleer fundador y embahador di Go Cultura Foundation a declara.
Semeleer a splica cu esaki ta pa nan mira cu no solamente ta importante pa papia di dje pero cu tin un grupo den comunidad cu ta tuma cultura y arte na serio y di nan banda tambe nan a tuma e iniciativa pa sigui cu e pasonan pa yuda desaroya e industria.
Pa e motibonan aki, entre otro, e fundacion ta considera importante pa sigui crea espacionan pa industria creativo y cultural. P’esey nan ta informa cu nan tin otro encuesta cu studiantenan di Universidad di Aruba tocante nan percepcion pa cu herencia cultural di Aruba cu ta bay cuminsa den dianan aki.
Di loke ta trata e sesion informativo di mañan diasabra 20 di mei cu ta cuminsa 6or di atardi, mester registra via e telefon 5695442 of info@gocultura.org pa por participa.
