Diasabra anochi, dilanti un publico exclusivo Go Cultura Foundation a presenta oficialmente un documentario basa den varios aña di investigacion pa loke ta trata storianan desconoci di himno y bandera di Aruba.

Edjean Semeleer ken ta fundador y embahador di Go Cultura Foundation a splica cu na comienso, e idea tabata pa duna di conoce e documentario na luna di maart specificamente prome cu e fecha di 18 di maart, pero debi na un blackout cu a tuma luga den e dianan ey, parti di e filenan a haya problemanan y nan mester a edita di nobo.

Mientras tanto, den e tempo ey a descubri mas cos, nan a logra haya mas grabacionnan specialmente di e anochi di 18 di maart 1976 “imagennan cu boso ni un a yega di wak ainda ya cu no ta na Aruba nos a haya nan pero ora boso wak e documentario aki, mi ta kere cu pa hopi di boso lo hiba back den tempo, si acaso boso a experiencia 18 di maart 1976 sea riba scenario e anochi ey of kisas den publico,” el a sigura.

Di e anochi ey el a splica cu hopi hende a haya un banderin y a wak e bandera original na laira, sinembargo, 13 aña pasa, ora Semeleer y conhuntamente cu Arthur Loefstok director di e fundacion a cuminsa investiga e origen di e bandera di Aruba, el a bisa cu e tabata den un exposicion mirando potretnan di Fundacion Betico Croes den e casa di difunto Betico y el a wak potret di un Sra cu a bin for di Merca cu su famia y Harry Croes para band’i dje “mi a mira mas caranan conoci y ma pensa, kisas banda di e discusion politico, hopi emotivo y hopi emocional di e bandera, nos lo por mira e creacion di un bandera for di angulo di un persona cu no ta un politico, no ta local, cu tabata bezig cu e proceso artistico y creativo di creacion di bandera,” el a bisa.

Den mesun potretnan cu Semeler tabata wak, el a mira Sarah Bollinger, e diseñador di bandera di Aruba hunto cu su yiu homber, na e momento ey el a pensa di tuma contacto cu nan pa wak si kisas nan por a papia cu Bollinger, pero lamentablemente Bollinger a fayece.

For di e momento ey, e yiu homber di Bollinger ta bin compartiendo informacion cu Semeleer y Loefstok cu sigur cu hendenan di Aruba no ta conoce “den e documentario boso ta bay wak hopi di e perspectiva di Sarah Bollinger, kisas varios di boso no a tende di e nomber aki, sinembargo, e ta bay yuda boso perspectiva di compronde tambe dicon tin asina tanto polemica rond di e bandera di Aruba y basicamente, mi conclusion ta hopi simpel y facil, pero e discusion aki ta bay keda pa hopi tempo mas, nos no a haci e documentario aki pa crea mas polemica ni pa cambia historia, nos a purba di revisa tur hecho posibel,” Semeleer a comenta.

E bandera su proposito principal tabata inspiracion y union cual a logra sigur, sinembargo, despues di casi cinco decada, ainda e ta topico di discusion y de bes en cuando te hasta di division, “nos tur por a mira un variacion grandi di varios color di nos bandera, varios grandura y te hasta diseñonan diferente, e comercialisacion acelera, descabeya y descontrola di e bandera di Aruba a percura cu continuamente banderanan cu estilonan nobo a keda wordo añadi na Aruba su coleccion di bandera,” un parti di e documentario ta señala.

Despues di hopi aña di pregunta, discusion y dialogo, Go Cultura Foundation a dicidi explora angulonan cu no a wordo explora prome no necesariamente pa caba cu e discusion continuo di e bandera y vooral su color, pero pa purba descubri historianan desconoci di e simbolo nacional.

“Aruba su anhelo di autonomia a cuminsa den decada 40 di siglo 20 pero e tabata te cu decada siglo pasa cu e isla tabatin curashi pa soña cu un emblema completo y tangibel pero tambe pa determina su propio destino. Bao liderazgo di Betico Croes, Aruba a realisa importancia di simbolonan nacional pa por yega mas cerca di un Aruba liber y soberano.”

Na aña 1976 gobierno insular e tempo ey, a institui un comision pa yuda Aruba dicidi pa un himno nacional y un otro comision pa tin un bandera nacional, e comision institui 21 di januari specificamente a consisti di Julio Maduro como presidente, Ronald Donk y Walter van Romondt como miembro y Epi Wever como secretario, esaki tabata e grupo cu mester a conseha gobierno pa un bandera insular pa Aruba.

Nan tabatin 6 siman pa completa e tarea importante aki, caminda un competencia di bandera a wordo anuncia unda comunidad Arubano a activa nan creatividad y yuda crea e bandera.

693 diseño a wordo presenta, a bira conoci cu na final tabatin mas di 780 diseño cu a sali di e curason di Aruba su habitantenan.

Di tur e propuestanan, a selecciona 3 diseño caminda Sarah Bollinger asesora pa Whitney Smith, un experto den diseño di bandera, a traha un diseño nobo pa Aruba.

Pero e historia di Aruba su bandera ta bay mas leu cu un diseño di un Sra. Mericano, den e documentario hopi interesante aki lo por descubri mas informacion.

Riba e pregunta ki dia e documentario lo ta accesibel pa publico en general, e informacion aki te ainda no ta conoci.

Go Cultura Foundation lo duna mas detaye proximamente.