Recientemente, fundacion Go Cultura a anuncia riba su rednan social un evento cu nan opinion, lo ta bay marca historia como e prome conferencia dedica na industrianan cultural y creativo, durante cual ta bay reuni un red di talento pa tene discusion y colaboracion.

For di momento cu Go Cultura Foundation a lanta na 2017 nan ta bin treciendo dilanti cu industrianan creativo na Aruba mester di mas reconocemento, apoyo y sosten. Sinembargo, tur pais cu a formalisa e industrianan aki a demostra cu esey no por keda na palabra so, sino cu mester actua pa cristalisa e desaroyo y bienestar di e ser humano.

Por a recorda cu na april ultimo, Edjean Semeleer, fundador y embahador di Go Cultura Foundation, a splica cu oficialmente nan a lansa un encuesta den cual nan kier a colecta data y informacion pa por midi e potencial economico di e industrianan cultural y creativo, pa haya sa kico ta e reto y desafionan cu e sector aki ta haya su mes aden, pero basicamente pa na final por tin evidencia y cifra cu por demostra e potencial, pero tambe por sa e necesidadnan y ki programa por desaroya pa por yuda e sector aki. “Pa e artista of e creativo por ta mas exitoso den su emprendimento cu plannan na corto, mediano y largo plaso y nan por desaroya den un industria y demostra den un par di tempo cuanto empleo y ingreso e industrianan aki ta genera.”

Pa por a realisa esaki, Go Cultura Foundation a haci un aliansa cu Cornerstone Economics, un compania di consulting cu ta brinda conocemento strategico basa de investigacionnan y solucionnan di aprendisahe cu enfasis den impacto social y viabilidad financiero, “den esfuerso di encuesta aki, esaki ta un di e iniciativanan mas importante na unda Go Cultura Foundation ta un organisacion no gubernamental, apolitico, caritativo cu den pasado a trece dilanti algun iniciativanan,” Semeleer a expresa.

Na Aruba esaki ta un topico nobo pero industrianan creativo ta existi for di decadanan caba manera e celebracion cultural di Carnaval e cual ta un creacion di e industrianan aki, Semeleer a expresa.

Semeleer a señala na e tempo ey, cu den un futuro mas cercano nan tin planea di organisa un presentacion cu hopi mas informacion y un di e prome pasonan ta e encuesta pa cuminsa map e industrianan cultural y creativo di Aruba, “si bo ta desea pa cosnan por mehora pa e sector aki, si bo ta desea pa e artistanan di Aruba por ta mas exitoso den loke nan ta haci, mester di cosnan in place como maneho, leynan cu mester adapta, modernisa of introduci, nos tin cu descubri hopi di e retonan cu hopi di artista creativo ta confronta pa wak con por yuda nan mehora esakinan,” el a sigura.

Recientemente, nan a anuncia e conferencia Creactivo, cual nan ta sigura cu ta un plataforma pa tur esnan cu tin un mente creativo y asina por conecta cu artistanan, diseñadornan, escritornan, cineastanan, musiconan y mas. Incolucrando esnan cu ta traha politica, esnan cu ta tuma decisionnan y stakeholders clave pa forma e futuro di e sectornan creativo manera institutonan financiero y gremionan clave tambe ta hunga un rol crucial, pa asina sigura cu e bosnan cu ta forma e sector cultural y creativo por wordo scucha y apoya. Stimulando asina un ecosistema creativo vibrante.

Esaki ta bay ta un evento di dos dia, 8 y 9 di october.

E conferencia Creactivo ta un plataforma unda tur esnan creativo y innovativo por uni pa comparti nan trabao, amplia nan horizonte y construi conexionnan di hopi balor.

Maske ainda Go Cultura Foundation no a informa tocante speakernan cu ta bay participa den evento aki, nan ta señala cu lo tin oradornan diverso y Inspirador, cu lo skucha di lidernan local y internacional distingui cu lo comparti nan experticio y visionnan pa e futuro di creatividad y innovacion.

Esaki ta bay ta un evento unda profesionalnan estableci y talentonan emergente por uni pa explora oportunidadnan nobo, influencia maneho y desaroyo, obtene apoyo financiero y construi colaboracionnan cu ta transcende e fronteranan tradicional. No ta importa si bo ta un profesional cu hopi experencia of cu awo bo ta cuminsando den e industria creativo.

Nan ta afirma cu CreActivo ta bay ofrece algo di gran balor: e oportunidad pa forma parti di un comunidad dedica na cultiva creatividad y desaroya un industria di forma sostenibel.