Ayera tabata un dia di hopi movecion den e isla mirando tur accion cu sindicatonan y nan miembro a haci pa asina nan vocifera nan mal contento tocante e recorte di salario di 12.6%, na unda cu un di e departamentonan como Guarda Nos Costa (GNC) tambe a uni na e accion aki.
“Nos tambe ta solidario cu tur e sindicato na Aruba pa cu 12.6% cu a wordo kita for di nos salario, e ta afecta un y tur y p’esey nos a sali, pa ta solidario cu tur, pasobra nos kier sa kico a pasa cu e placa cu nan a kit’e y e ta afecta nos tur na unda cu pa luna e ta un bedrag cu hopi di nos no por carga, ”, Melvin Ras Shopsteward di Seppa y trahado di GNC a bisa.
Sindicatonan ta na mesa cu gobierno pero pa cada biaha ta bin algo na unda loke nan ta pidi ta claridad, pa gobierno duna certeza na nan di kico ta pasando, manera Ras a afirma.
Ayera mainta keda conoci mediante un lista, e departamentonan di gobierno y organisacionnan cu lo a tuma accion na unda cu tambe Bon Dia Aruba a puntra na Ras si na departamento di Guarda Nos Costa ta existi intimidacion pa e hecho cu nan a dicidi di uni na e protesta aki, “cerca nos no tin intimidacion y tampoco nos tin miedo pa intimidacion, loke nos mester haci ta responsabel, nos ta traha cu un dienst cu tin hende den cas y nos a scoge un ora responsabel tambe”, el a sigura.
Asina mes, el a trece dilanti cu tur hende ta consciente di e situacion di Aruba, “pero si e ta bon pa un, e mester ta bon pa tur”, Ras a expresa.
Si nan no ta haya oido di gobierno, el a sigura cu esaki ta e comienso manera otro sindicato a indica pa wak kico ta bin na resultado y despues nan ta bay pensa kico otro pasonan nan lo sigui.
