Ayera for di oranan trempan a tuma luga un Global Network Outage na unda miles di pasahero na nivel mundial tabata prepara pa cuminsa nan vakantie di zomer, mientras cu na Aruba solamente a afecta yegada di algun vuelo.

Esaki tabata debi na un update defectuoso cual for di oranan di marduga di ayera diabierna a interumpi e servicionan di varios aerolinea y aeropuerto rond di mundo, incluyendo esun di Merca.

Por lo menos cinco aerolinea Mericano manera Allegiant Air, American, Delta, Spirit y United mester a suspende nan servicio durante varios ora di manera obligatorio, indicando problemanan di comunicacion. Te oranan di merdia di ayera diabierna mas di 2,000 vuelo paden of pafo di Merca mester a ser cancela y otro 5,700 a sufri retraso, segun Flight Aware, cual ta un base di datonan cu ta monitoria informacion di vuelonan a señala.

Na Hulanda, aeropuerto di Schiphol tabata scenario di rijnan largo pa check in. Esaki tambe a coincidi cu e prome dia di zomer na scolnan di Hulanda, mescos cu Merca, na unda e fayo global aki tambe a afecta varios hospital di e pais, por ehemplo, na Emmen caminda a cancela tur operacion pa e dia di ayera, mientras cu varios centro di urgencia no a ricibi pashentnan.

Transporte publico tambe a ser afecta na varios luga di e pais afectando totalmente e circulacion di busnan, treinnan tabata circula di manera normal.

Na Aruba, autoridad di aeropuerto ayera diabierna den oranan di mainta cu esaki “no tabata afecta aeropuerto.”

Siguientemente a publica riba rednan social cu “Debi na e Global Network Outage, nos kier informa na nos pasaheronan di AUA y publico en general cu, te awor, esaki no a afecta operacionnan di aeropuerto di Aruba. Algun aerolinea por experimenta un retraso y nos ta recomenda na pasaheronan pa verifica status di nan vuelonan cu e aerolineanan prome cu lo dirigi Aruba. Danki pa e comprension.”

Pero tur e caos, rijnan di spera masivo na otro aeropuertonan na nivel mundial tabata pa via di un antivirus di e firma di cyber security CrowdStrike cual un update a tumba e sistema operativo di Microsoft, un di e mas usa na mundo. “No ta trata di un incidente di seguridad ni di un cyber atake,” George Kurtz director ehecutivo di CrowdStrike a bisa riba su rednan social.