(AP) — Decenas di website a cay brevemente rond mundo ayera, incluyendo CNN, The New York Times y e pagina di gobierno Britanico, despues cu un fayo na e servicio di cloud computing Fastly, ilustrando con vital un cantidad chikito di compania tras di cortina a bira pa maneho di internet.
E websitenan na cual no por a haya acceso tambe ta inclui algun pagina di Amazon, e Financial Times, Reddit, Twitch y The Guardian.
Fastly, basa na San Francisco, a reconoce e problema tiki prome cu 6am Eastern. Alrededor di un ora despues, e compania a bisa: “E problema a wordo identifica y a aplica un solucion.” Mayoria di e websitenan a parce di ta back online tiki despues.
E compania a bisa den un declaracion via e-mail cu tabata un ‘problema tecnico’ y ‘no relaciona na un atake cibernetico’.
Asina mes, mercadonan futuro mayor na Merca a mira un caida skerpi minuutnan despues di e shut down, cu a yega un luna despues cu hackernan a forsa e shut down di un di e tuberianan di fuel mas grandi na Merca.
Fastly ta un red di entrega di contenido, CDN (Content-Delivery Network). E ta provee cloud computing ‘edge servers’ vital pero tras di cortina na cantidad di e websitenan mas popular riba internet. E servernan aki ta warda of ‘cache’ contenido manera imagen y video na luganan rond mundo pa asina e ta mas cerca na usuarionan, permitiendo nan pa haya esaki mas lihe y facil.
Fastly a bisa cu su servicionan ta nifica cu un usuario Europeo bayendo un website Mericano por haya e contenido 200 pa 500 miliseconde mas lihe.
Medida di trafico di internet di Kentik a mustra cu Fastly a cuminsa recupera di e shut down alrededor di un ora despues cu esaki a sucede mainta den orario Europeo, prome cu mayoria di Mericano a lanta for di soño.
“Parce cu e ta bolbe poco poco”, segun Doug Madory, un experto di infrastructura di internet na Kentik. El a bisa cu ‘esaki ta serio pasobra Fastly ta un di e CDNnan mas grandi na mundo y esaki tabata un caida global’.
Caida di internet breve no ta inusual y ta tiki biaha ta resultado di hacking of otro actividad malicioso.
Fastly a bula casi 11% ayera mientras inverisionistanan a ignora e problema. Asina mes, e incidente a resalta e fragilidad relativo di arkitectura di internet mirando su dependencia pisa riba companianan di Big Tech – manera servicionan cloud AWS di Amazon – na luga di un grupo di compania menos centralisa.
“Hasta e companianan di mas grandi y mas sofistica ta experimenta caida. Pero nan tambe por recupera mas rapidamente”, Madory a bisa.
Ora e suceso a tuma luga, algun bishitante purbando di haya acceso na CNN.com a ricibi un mensahe bisando: “Fastly error: unknown domain: cnn.com.” Intento pa haya acceso na website di Financial Times a duna un mensahe similar, mientras bishita na The New York Times of gov.uk di Gobierno Britanico a duna un mensahe di ‘Error 503 Service Unavailable’, hunto cu e linea “Varnish cache server,” cu ta e tecnologia riba cual a construi Fastly.
Down Detector, cu ta track caida di internet, a post reporternan riba decenas di website cu a shut down.
