Secretario den e maneho di Fundacion Parke Nacional Arikok y Rector na Universidad di Aruba, sr. Glenn Thodè ta kere cu en berdad e coordinacion y comunicacion entre Parke Nacional y Operador di Tour por ta miho. Na momento di registra un tour na Parke Nacional, Tour Operators cu ta bini cu turista ta haya informacion apropia y contesta na cualkier pregunta prome cu cuminsa cu e tour,pero sinembargo segun sr.Thodè esaki sigur ta bay tin mester di mehora.
”Aworaki nos ta den un proceso pa e siman ki mes haci un afspraak cu Instituto Medico San Nicolas (IMSAN) , kende ta esnan cu a trata cu e turistanan den e incidente ultimo di e jeep cu a bolter na Arikok, pa wak cu nan tambe con pa mehora nos protocol di pidi asistencia y informa otro pa atende casonan similar. Naturalmente cu polis tambe nos lo mester sinta pa wak con nos por mehora tanto e intercambio di informacion entre polis y parke, pero tambe en berdad , kisas tambe polis tin bon tip na con mehora infrastructura , informacion y kisas e regulacionnan cu nos tin”
Sr.Thode ta agrega cu tin informacion cu tin kisas comportacion cu no ta precies manera cu nan ta spera.
”Despues di e ultimo incidente ,pa nos ta importante pa compronde e caracter y kico tabata ta tambe e rason pa kico e incidente aki por a tuma luga na modo cu nos por drenta den dialogo nobo cu Operadornan di Tour pa purba evita cu tipo di incidentenan aki sigui pasa den futuro” , sr.Thode ta splica.
Den pasado, Parke Nacional tabata tin combersacion cu diferente Operador di Tour pero sinembargo ta mira cu mester atende e combersacionnan aki di nobo y tambe introduci kisas ideanan y iniciativanan nobo.
Maneho di rescate mester mehoracion ; Mester enfoca riba prevencion
Segun sr.Thode, Dios gracia cu Parke Nacional den su historia ta haya mas bishitante den comparacion cu incidentenan tragico. E parke no ta un area normal caminda tin un infrastructura cu por maneha facil den dje y tin parti di e parke cu ta hopi dificil pa yega eynan specialmente cu un vehiculo na ora ta trata casonan di emergencia. ”Naturalmente, den un mundo ideal lo ta ideal pa nos cuerpo policial of cuerpo di emergencia porta hospital por tin un helicopter pa yuda ora cu tin un incidente grave caminda ta dificil pa yega cu un otro vehiculo. Nos mester enfoca riba prevencion, den mi opinion esaki lo ta e cos mas miho. No pa nos bisa ban inverti masha hopi cen den un helicopter so pero laga nos inverti un poco mas atencion den informa tur hende na un bon manera kico ta e riesgonan pa evita cu incidente tuma luga den un luga dificil pa yega den parke y den general” , sr. Thode ta bisa.
