Aunke Glenda Zavala-Maduro no a nace na Valledupar (Colombia), e ta un cantante, compositor y amante di e musica di acordeon aki. Ademas di e caracteristicanan aki, Glenda ta un hende muhe cu curashi y determinacion.

Glenda ta bay representa Aruba pa prome biaha como hende muhe den un festival internacional di Vallenato femenino. E festival cu a wordo yama EVAFE lo tuma luga dia 22, 23 y 24 di november na Valledupar, considera como e ciudad capital mundial di Vallenato.

E festival aki tin varios aña cu ta tumando luga, pero e aña aki nan a dicidi di habri nan frontera y haci’e internacional. T’asina cu un par di hende Colombiano cu Glenda ta conoce, tabata hopi entusiasma pa nos yiu di tera bay participa den e festival aki. Glenda a acepta e reto! E ta consciente cu no ta nada facil, pero su amor pa musica Vallenato ta mas fuerte, y asina el a expresa den su composicion cu e ta bay participa cu ne den e festival aki. Un pida di e composicion ta bisa asina: “Le presento esta dama que ha venido de otras tierras, con el firme propósito de darles una canción. El folklore Vallenato no lo llevo en mis venas, pero la quiero tanto y la tengo en el corazón….”

Amor pa Vallenato.
Glenda ta un Ranchero di pura sepa, unda e musica Vallenato a drenta Aruba, danki na e lasonan historico entre Aruba y Guajira. Rancho cu tabata un pueblo di piscado, tabata e refugio di nabegantenan y comerciantenan cu tabata bini regularmente for di Guajira cu su productonan, pero tambe cu nan disco LP di musica Vallenato.

For di mucha, Glenda su gusto pa musica Vallenato a nace. E tabata un mucha di 8 aña ora cu el a cuminsa scucha algun migrante Colombiano cu a bin biba na Aruba, canta y toca nan acordeon. Despues el a cuminsa participa den festival Vallenato organisa na Aruba mes.

Na aña 2006, Glenda a participa den un festival Vallenato caminda el a composita un cancion cu e nomber ‘Un abrazo, un folklore’. Den e tema musical aki el a honra tres persona. “Nan tres persona cu a duna Vallenato y a duna Aruba su merito,” el a bisa.

Un di nan ta Edwin Benitez, kende a percura pa Vallenato por a integra na Aruba. Benitez ta un Colombiano kende a establece pa basta aña na Aruba y cu a bay representa nos isla pa prome biaha den un festival di Vallenato, Francisco ‘El Hombre’ na Valledupar. E di dos ta e icono Arubiano di musica Vallenato, Vicente Kelly kende Glenda a honra cu su composicion. Vicente a yega di representa Aruba den varios ocasion den festival di Vallenato na Colombia. E di tres ta Robert Jeandor, un musico Arubiano virtuoso, kende su talento y musica a pone Aruba su nomber resona internacionalmente.

Compositor.
Glenda tin un habilidad natural pa composita cantica. Otro tema musical cu el a compone bou e titulo ‘Un Sueño Vallenato’, a haci cu Glenda a tuma contacto cu e organisacion di e festival EVAFE. Nan a pidi pa Glenda manda su cantica pa evalua si e por cay den e categoria di e festival, y nan a keda namora di dje. Nan a pidi e pa participa cu e cantica aki y representa Aruba den e festival Vallenato aki, unda exclusivamente ta participa ser femenino.

Glenda e letra di su composicion tin hopi contenido. Un di nan ta bisa asina: “Además de ser de esta región donde existe el folklor de la tumba y de la gaita. Viejo sones de Aruba con amor con cuatro y tambor lo que identifica mi alma. Como soy una mujer de tesón tengo la sensación de que estoy enamorada. De un señor humilde y galardón producto de otra región, la música Vallenata….”

Recientemente cu presencia di Prome Minister di Aruba, Evelyn Wever-Croes y minister di Cultura, Xiomara Ruiz-Maduro, el a haci e presentacion di su dos tema musical cu e mes a composita di su propio inspiracion na Centro di Actividad Rancho. E anochi ey, e bos melodioso di Glenda a haci echo den pleno curason di e bario historico aki, deleitando e dos mandatario y publico presente, y recordando e tempo di antes, ora cu Vallenato a haci su introduccion na Aruba.