Ayera mainta a bira conoci e noticia di suspension di detencion di ex-minister Glenbert Croes ken ta acusa di soborno y mal uso di su funcion y ademas el a logra sali for di hospital debi cu su situacion di salud a complica mientras e tabata den warda di polis.
Den un declaracion cortico cu abogadonan di e ex-mandatario, Demis Illes y Vito Carlo a manda na redactor di Bon Dia Aruba a señala lo siguiente:
“Pa medio di e declaracion aki, team di defensa di Sr. Glenbert Croes ta confirma cu awe mainta 11:00am e suspension di su detencion a drenta na vigor. Tanto e team di defensa como Ministerio Publico a solicita e suspension di su detencion. Hues comisario a honra e peticion aki bao algun condicion. Croes a confirma cu lo cumpli cu e condicionnan stipula pa hues comisario. Por lo demas, a peticion di Croes, ta confirma cu su persona, despues di a retira como minister manera ley ta stipula, alabes lo retira y tuma distancia di politica. Pa awor Croes kier concentra riba su salud y su famia.”
Pa loke ta trata e caso mes, por divulga cu ta trata dos cargo/acusacion: Soborno y mal uso di funcion.
“Croes ta confirma su inocencia contra e dos sospecho den su contra y lo bay dedica tempo na su defensa pa comproba esaki,” e comunicado ta señala.
Croes a ser deteni dia 7 di october ultimo pa ta sospechoso den e caso Portulaca y a ser hiba te Mariniers Kazerne, algo cu su mesun abogadonan no ta compronde e motibo di esaki, segun a sigura.
Di otro banda, oficina di su Excelencia Sr. Gobernador Alfonso Boekhoudt a sigura cu “Gobernador a tuma e decision awe pa retira señor G.F. Croes for di su funcion di minister. E decision pa retira minister Croes a wordo tuma despues cu el a pidi esaki di acuerdo cu articulo 17, sub b, di e Ordenansa Nacional pa Integridad di Ministernan.”
Reaccionando riba e carta cu Gobernador a manda dia 9 di october 2024 pa Presidente di Parlamento, den cua a pidi – segun Constitucion ta prescribi – opinion di Parlamento, Parlamento a bay di acuerdo cu e retiro di minister Croes. Gobernador a dicidi tambe di encarga señor R.G. Tjon, minister di Husticia y Asuntonan Social cu e maneho y responsabilidad di e ministerio di Labor, Energia y Integracion.
