Glen Geerman: Motivando hoben cu creatividad pa sigui crece

Bon Dia Aruba a entrevista Glen Geerman, kende ta un fotografo local. Cada luna Geerman ta haci evento riba diadomingo pa fotografo y modelo bin hunto pa asina sigui crece den nan talento.

E ta bisa cu e idea di e proyecto ‘Sombre Sunday’ ta pa fotografo y modelo yega hunto pa duna oportunidad pa saca potret y haci un sesion fotografico. E fotografo por mustra su trabou y asina promove su mes den su arte y creatividad. Pa modelo tambe ta un manera cu por promove nan mes y haya experiencia den nan ramo.

Geerman ta bisa cu henter e idea ta pa haci un ‘photoshoot leuk’. Cada biaha e organisa un sesion, e ta haya reaccion di fotografo cu ta cuminsando of cu tin experiencia caba pa por participa. Tambe ta bay asina cu modelo.

No tur ora nan mester ta riba un nivel halto of experiencia, pasobra e idea ta pa nan crece hunto. “Tin esunnan cu tin tempo pero tambe esunnan cu ta cuminsando den fotografia. Di e manera ey nan por siña for di otro.”

Geerman kier purba di keda alcansa hoben na caminda pa crea algo y ta un motivacion pa esunnan mas hoben, pa asina ‘nan por haya ayudo y por beneficia di dje’. Pa locual ta trata e modelo, e ta bisa cu tin di nan tin experiencia den modelahe y tin cu ta nobo.

Sinembargo nan tambe por crece y siña bira mas confortabel cu nan mes y crece. Geerman ta purba di wanta e evento ‘mas comodo y positivo cu ta posibel’. Pa entrega producto final di e photoshoot, Geerman ta splica cu esey ta keda na imaginacion di cada fotografo. E por duna algun tip pero ‘cada ken mester ta creativo pa edita y uz’e manera nan kier’.

Segun Geerman, den cada persona tin diferente imaginacion cu creacion. Cada fotografo por bin cu nan mesun manera di con nan ta sinti of haya mas comodo cu nan mes. Di e forma ey nan por expresa nan idea.

A puntra algun modelo y fotografonan con nan experiencia tabata durante e proceso di Sombre Sunday. Nan tur a comparti e mesun sentimento, caminda nan ta expresa cu nan a siña hopi y pa e motibo aki ta keda participa.

Tambe un di e modelonan a conta cu tabata persona timido y tabatin miedo, pero ora cu a participa como modelo, poco poco el a perde su miedo y timidez, esey a pone cu awo e ta un persona cu ‘ta durf mas y tuma riesgo’.

“Mi ta haya for di momento mi a cuminsa te awo, mi a crece manera persona, y el a yuda ami hopi den bira mas confortabel. Mayoria di biaha mi ta participa. Y mi lo recomenda ken cu ta cu ta interesa den fotografia of modelahe pa participa y sigur nan lo sinti nan mes bonbini”, e modelo a bisa.

Geerman ta bisa cu ta duna oportunidad na cada fotografo y modelo pa traha den trabou comercial ora cu otro compania of persona wak nan trabou. Cu e motivacion ey nan ta keda haya mas balor y mas interes pa sigui participa.

Esaki ta Geerman su di 11 edicion y ta sinti e lo continua te ora cu e por. “E idea ta pa duna nan tip pa nan por sigui progresa y nan por yega na un nivel mas confortabel cu nan mes”, Geerman ta expresa.

Den cada arte mester dedica tempo na dje, sin importa na ki edad, sea grandi of hoben, si bo tin pasion y kier logra p’e. Sinembargo e ta agrega cu si hende cuminsa di chikito nan por saca gana experiencia y kita e miedo. Nan cuminsa na un edad hoben, nan por experimenta mas y haya inspiracion.