EdM GKMB (4).jpg

Segun cifranan di e ultimo 6 siman Gele Koorts Muskieten Bestrijding (GKMB) no ta mira un aumento grandi den e casonan di malesanan transmiti pa sangura.

 

Clayton Croes di GKMB ta conta Bon Dia Aruba cu den e periodo menciona tin 78 caso di Dengue, 1 caso di Zika y te ainda 0 di Chikungunya. Cual ta relativamente ‘slow’, segun e y e ta spera cu ta keda asina.

 

A base di datonan colecta pa GKMB durante hopi aña, por conclui cu den e temporada di awa, unda tin mas molester di sangura, ainda ta october, november y december. Lo por mira e consecuencia na lunanan di januari y februari. E cantidad di criaderonan por subi, pero a base di e trabounan preventivo haci henter aña, ta spera cu e casonan sospechoso lo bay ta menos, sr. Croes ta bisa.

 

E Aedes Aegypti ta e sangura conoci cu ta transmiti e malesanan di Dengue, Zika y Chikungunya. E Culex Pipiens cu ta conoci na Aruba como e sangura di pos. Esun aki ta wordo haya tur caminda henter dia y ta e sangura mas comun. Y tin esun preto cu bo ta haya mas den e mangelan. Tin un sorto mas di sangura cual ta e Zorofora, cu nan ta yama e sangura bobo, pasobra e ta grandi y nan ta sali den gran cantidad pero nan no ta pica.

 

Ekipo nobo

Awor cu GKMB a haya ekiponan nobo y mas sofistica cu ta e BG sentinel for di Alemania y ta special pa haci e tipo di controlnan aki, GKMB ta prepara pa bay haci e control grandi atrobe cu ta bay duna dos informacion importante cu ta cuanto sangura tin di berdad den veld mes y lo mustra tambe ki tipo di sangura tin den e area.

Sr. Croes a sigui bisa cu tin e plan pa pone tur e informacion colecta durante aña y haci nan digital. Tambe e ta spera cu den un futuro no lehano, e trahado den veld no lo uza un map mas sino un tablet cu e por suministra e informacion den e tempo actual.

Tur adres cu GKMB duna un advertencia pasobra a haya criadero, por conta cu nan lo haya un bishita sorpresa y si ainda no a coregi e problema, e ora nan lo haya un multa.