For di December 2015 tabata tin 3 caso sospechoso di Zika y manera cu aña ta habri cu GKMB ta controlando esaki, mirando cu Zika a yega Caribe segun Clayton Croes. E ta splica kico ta e resultadonan for di December cu a pasa te cu awor aki na Masnoticia.
Pa e dianan aki Zika lo bay haya su atencion di parti GKMB pa cual aki Croes ta splica cu e virus aki tambe tin su peliger cun’e pero tur cos ta den nos mes un man pa preveni esaki.
Siman pasa tabata tin 4 caso sospechoso pa loke ta Zika. E idea tabata cu lo trata esakinan den fin di siman, pa haya mas hopi cas habri. Inspeccion di GKMB a tuma esaki hopi na serio. Nan a expande e zona di control hopi mas. E parti positivo ta cu casi ningun criadero a wordo haya activo, pero centenares di criaderonan potencial. Di e casi 125 cas cu a wordo controla, un criadero tabata tin. Uno chikito den un pos. Criaderonan clasico, manera scoter bao di mata, hemchi y e bari, no a wordo haya. Por a wak den dagrapport cu tabata tin centenares di criaderonan potencial, cu e caida di awa den e dianan aki. Por conta cu criaderonan potencial ta bay yena cu awa y esakinan lo por bira criaderonan activo, si den pasado webonan di e sangura a wordo poni den esakinan. Ta un bon momento pa bolbe corda. A wordo bendiciona cu awa no a cay. Pero naturalesa ta hari y awa ta cay, cu ta haci cu nos tin cu pone atencion rond di nos cas, pa asina tuma cuenta cu criaderonan potencial manera bari, scoter, etc., Por tuma contacto cu GKMB caminda cu tin maneranan special pa trata esakinan. E peticion ta pa keda controla. Ta un manera esencial pa preveni cu famia y sernan keri, por haya of dengue, chikungunya of Zika. Si no tin criadero, no tin sangura, si no tin sangura, no tin dengue, ni chikungunya y ni Zika tampoco, Croes a finalisa.
