“Hendenan ta cooperando y ta ripara cu hopi hende tin nan cura bon limpi”, ta locual Roque Dirks di GKMB a bisa Bon Dia Aruba. Tambe el a confirma cu a haya diferente criadero. Nan a elimina esakinan y mustra e habitantenan riba e posibel consecuencia di ricibi un boet si durante proximo control constata mesun situacion. Boet ta encera 50 florin pa cada criadero.
“Mi ta ripara cu e container index ta abou esaki kiermen cu ora e container index ta abou, ta indicativo cu e hendenan ta consciente cu nan ta deshaci di criaderonan potencial. Pues si eventualmente awa yobe lo no tin cria.” Segun Sr. Dirks e ta bisa cu ta danki na media ta ripara cu e hendenan ta hopi na altura, nan ta consciente di con serio e situacion aki ta.
Ta drenta cura cu aprobacion doño
A puntra sr. Dirks kico ta spera di habitantenan pa loke ta e control cu GKMB y grupo ta haciendo. El a bisa: “Normalmente ta e pueblo ta fia nos nan confiansa ora cu nos ta haci peticion pa haci un recorido den e cura. Nunca nos ta drenta un cura sin cu e doño di cas su aprobacion, pa motibo cu ta un privacidad e ta. Pero semper te cu aworaki niun hende ta nenga nos, nan ta consciente di e trabou di GKMB. Ta p’esey tambe ta percura pa no daña e atencion presta aki cu nan ta permiti nos controla, cual ta un di e motibo nan tambe cu e biaha aki a opta pa no duna boet.”
Hopi hende ta cuestiona e punto aki y ta puntra dicon no ta cuminsa cu partimento di boet pa hende tene nan cura limpi. A haya casnan cu criadero esey ta berdad, Sr. Dirks a bisa. “A haya cas cu 10 criadero, yen rommel den cura etc. Hendenan asina aki si nos ta splica nan cu si proximo biaha ora cu nos bin controla y haya un situacion atrobe cu e cura no ta limpi e ora si nan por haya boet.”
50 florin cada criadero
Normalmente segun nos leynan vigente, ta duna cu pa cada criadero bo ta haya 50 florin di boet. Por ehempel, bo por tin 10 taira unda cu a constata larva aden e ora nos ta duna advertencia y ta bisa e habitante di kico a constata. Pero e proximo biaha si no ripara cambio den nan comportacion por duna boet. “Y nos a yega di duna boet pero nunca nos ta bisa cu ta duna boet directamente pasobra nos no ta hacido di malo.
Team standby
Pa esunnan cu ta biba den barionan manera San Nicolas, of cualkier otro cu ainda tin varios siman pa warda prome cu e bario yega na turno pa haya bishita den e accion di spuit, Sr. Dirks a bisa cu tin dos grupo apart cu ta standby pa tur yamada apart cu ta drenta. Den cuadro di esaki el a bisa cu a haya yamada di scolnan tambe cu hopi problema di sangura, cual ta purba haci diasabra ora muchanan no ta na scol. Fuera di esey ta haya yamada di otro barionan cu tin hopi problema, cu ta wordo atendi pa e grupo cu ta keda standby, Sr. Dirks a conclui.
